Ukraina Prezidentiniñ Qırım MC Temsilciligi ”Qırım-SOS” aq qorçalav teşkilâtı ve insan aqları boyunca Ukraina-Helsinki birligi ile beraber Telegram içtimaiy ağında çalışqan CrimeaIsUAbot (t.me/CrimeaIsUaBot) subet botunı taqdim etti. İşbu vasta vaqtınca işğal etilgen Qırım yarımadasında yaşağan Ukraina vatandaşlar içün yaratılğandır. Onıñ yardımınen eñ çoq soralğan suallerge umumiy cevap almaq mümkündir.
CrimeaIsUAbot subet botu vastasınen künde 24 saat, aftada 7 kün devamında Ukraina vatandaşı pasportını resmiyleştirüv, işğal etilgen topraqlarda doğuv ve ölüm adiselerini tasdıqlav, KÇNN-nı keçüv boyunca aktual malümatlarnı almaq mümkündir. Bunınen beraber, toldurılacaq vesiqalarnıñ nümüneleri mevcüt ve evelden nevbetke yazılmağa da imkânı bar.
Subet botu mütenasip devlet akimiyet organlarınıñ ve cemaat teşkilâtlarınıñ Internet saifelerinde yerleştirildi. Cevaplana bilgen sualler cedveli kenişlemege devam etecektir.
Vaqtınca işğal eilgen Qırım Muhtar Cumhuriyetine ve Aqyar şeerine irişim vaqtınca qapalı olsa da, işğal etilgen topraqlarda yaşağan vatandaşlarnen bağ tutuv pek müim ve Ukraina Prezidenti taqımınıñ ilk nevbetteki vazifelerindendir.
Ukraina Prezidentiniñ Qırım MC-deki Temsilciliginiñ hadimleri bu meselelernen faal şekilde oğraşmaqtalar. Vatandaşlarımıznen bağ tutuv vastalarından biri – olarğa memüriy, içtimaiy ve başqa hızmetlerni berüvdir.
”Devlet memuriy ve başqa hızmetlerni Qırım sakinlerine maksimal derecede yaqınlaştırğan vastalarnı yaratmalıdır. Laf yalıñız memuriy sıñırda yerleşlen memuriy hızmet merkezlerini ziyaret etüv imkâniyeti aqqında yürsetilmey. “Onlayn-hızmetlerni berüv imkâniyeti üzerinde çalışamız”, – dep izaatladılar Temsilcilikte.
Bazı hızmetlerni ve olarnı aluv boyunca tevsiyelerni al-azırda qısmen elektron şekiline keçirmege mümkün, bu imkâniyet üzerinde Prezidentniñ Qırımdaki Temsilciligi, vaqtınca işğal etilgen topraqlarnı ğayrıdan integratsiya etüv meseleleri boyunca Nazirlik, dijital deñişüv Nazirligi, adliye Nazirligi ve Ukraina Prezidentiniñ Ofisi çalışmaqtadır.
Elektron nevbeti vastasınen endi Ukraina vatandaşınıñ biometrik pasportı ya da ID-kartı içün vesiqalarnı tapşırmağa, aile ekimi ile añlaşmanı imzalamağa mümkündir. Aynı vaqıtta evlenüv adisesini resmiyleştirüv, onlayn-notariat, vaqtınca işğal etilgen topraqlarğa ketken yabancılar içün ruhsetname ve grajdanlıq vaziyetini, şu cümleden doğuv aqqında şeadetnamelerni resmiyleştirüv içün vesiqalarnıñ onlayn şekilde tapşırılması üzerinde çalışuv devam etmektedir. İşğalci akimiyet tarafından yapılğan suniy sıñırlavlar şaraitlerinde vaqtınca işğal etilgen topraqlarda yaşağan balalar içün aliy oquv yurtlarına vesiqalarnı onlayn şekilde tapşıruv saasında çalışuv da devam etmektedir.
Malümatnı ve yardımnı CrimeaIsUAbot, subet botu ya da Temsilcilikniñ Facebook içtimaiy ağındaki saifesinde ve resmiy Internet saifesinde almağa mümkündir.