Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç ve onıñ muavini Darya Svırıdova ”Siyasiy mabuslarnı azat etüv platforması” fırqalardan tış birleşmesiniñ vekillerinen körüşti. Körüşüvde Oleg Sentsov, İgor Kozlovskıy ve İgor Grıb bulundı

Birleşme çetelde, vaqtınca işğal etilgen topraqlarda ve devletimizniñ içinde siyasiy sebeplerden taqip etüv neticesinde apis etilgen bütün insanlarnıñ aqlarını qorçalamaq ve mabuslarnı azat etmek maqsadınen meydanğa ketirildi.

Körüşüv iştirakçileri Temsilcilik ve Qırım Platforması Ofisiniñ faaliyetini, ukrain siyasiy mabusları meslesini, Temsilcilik ile kelecekteki işbirliklerini ve hususan Kreml mabuslarını azat etüv, siyasiy mabuslarnıñ qorantalarına yardım etüv meselesinde ükümet ile beraberlikte yapılacaq adımlarnı muzakere ettiler.

Bundan ğayrı, Anton Korınevıç Ukraina Prezidenti tarafından acele olaraq taqdim etilip, Ukrainağa qarşı silâlı istilâ neticesinde şahsiy azatlığından marum etilgen şahıslarnı ve olarnıñ qoranta azalarını içtimaiy ceetten qorçalav aqqında 6104 sanlı qanun ve onıñ parlamentteki mevamı aqqında birleşme iştirakçilerini haberdar etti.