Qırımnı işğalden azat etüv ukrain akimiyetiniñ ilk nevbetteki vazifesi olmalı – Prezident

Prezident Petro Poroşenko Rusiye Qırımnı işğal etkeni içün büyük fiyat ödemege devam etkenini, Qırımnı işğalden azat etüv ukrain akimiyetiniñ ilk nevbetteki vazifesi olğanını qayd etti. ”Bügünki facialı yıldönüm ukrainalılarnı birleştirmeli, Qırımnıñ qanunsız alda ilhaq etilmesini toqtatmaq, işğalni toqtatmaq, Ukrainanıñ topraq bütünligini ve egemenligini, bu cümleden Qırım egemenligini ğayrıdan tiklemek içün ğayretlerimizniñ birleştirilmesini talap etken bir kündir”, – dep ayttı ICTV kanalındaki ”Söz serbestligi” teleyayını devamında devletimizniñ Başlığı.

Yayınnıñ alıp barıcısı, Putin Petro Poroşenko ile beraber ”qazan qaynatamayacağı” aqqında sözlerine cevap olaraq, ”Qazanlarını beraber qaynatacaqlardan işim yoq – men, bazı kandidatlar kibi, onınen ne de beraber qazan qaynatmaycam, ne de balıq avına barmaycam”, – dep qayd etti Petro Poroşenko.

”Qanunsız Qırım ilhaqı meselesinde Ukrainağa bütün dünyanıñ qol tutuvını celp etkenimizni tekrarlamağa isteyim. Bu meseleni siyasiy-diplomatik yolnen çezmek içün Rusiye Federatsiyasına qarşı sanktsiyalar qullanıla. Birinciden, Qırımnı azat etmege, ekinciden, qanunsız alda tutulğan ukrain cenk esirlerini, ukrain arbiy deñizcilerini azat etmege, arbiy mülkiyetni qaytarmağa talap etile”, – dep qayd etti Prezident.

”Aks alda Rusiye bunıñ içün pek yüksek fiyat ödey. Dünyada iç bir kimse RF sanktsiyalarnı qolay çıdağanına inanmay”, – dep qoştı devletimizniñ Başlığı. Onıñ sözlerine köre, al-azırda doquz milliarder sanktsiyalar olar içün pek ağır yük olğanını tanıdı. ‘‘Bloomberg’’ agentliginiñ malümatlarına köre, qanunsız ilhaq sebebinden Rusiye eñ azdan 150 milliard dollar ve Rusiye umumiy içki mahsulatınıñ 10% ğayıp etti.

”Bu sebepten, prezident saylavlarından soñ Qırım meselesi Ukraina Prezidentiniñ ilk vazifesi olacaqtır”, – dedi o.

Prezident qayd etti ki, bügün Avropa Birliginiñ Yüksek vekili Federika Mogerini AB Qırım ilhaqını iç bir vaqıt tanımaycağını ve sanktsiyalar siyasetini devam etecegini bildirdi. “Al-azırda Rusiye bu qanunsız ilhaq içün yüksek fiyat ödey. Al-azırda AQŞ-dan başlap ve Avstraliyağa qadar bütün dünya sanktsiyalarnı quvetleştirmege qarar etti. Ve bu, bizim diplomatik taqımımız yapqan faalietniñ neticesidir”, – dep ayttı Petro Poroşenko.

”İşte, birinci vazife – Qırımnıñ siyasiy-diplomatik yolnen azat etilmesi oğrunda halqara işbirlikni deral faalleştirmek. Bu, ukrain akimiyetiniñ ilk nevbetteki vazifelerden biridir”, – dep qayd etti Prezident.

Bundan ğayrı, devletimizniñ Başlığı tamam 5 yıl evelsi Qırımda Rusiye Federatsiyasınıñ muntazam arbiy quvetleri tarafından Qırım Yuqarı Şurası binasınıñ nasıl zapt etilgenini öz közünen körgenini hatırlattı. ”Öldürülgen qırımtatarlar içün mesüliyetni men Rusiye ordusına yükleyim. Şunda qatiyen eminim ki, bu işte doğrudan-doğru sözde ‘‘Qırım baş naziri’’ Aksyonov iştirak etti. O bügün şahsen bütün areketlerini Rusiye Federatsiyası Prezidenti Volodımır Putin ile uyğunlaştırğanını tanıdı”, – dedi o.

”Rusiye halqara cemiyetniñ talaplarını qabul etmek mecburiyetinde qalacaq, çünki BMT qararlarını yerine ketirmegeni içün, öz boyunına alğan halqara mecburiyetlerini yerine ketirmegeni içün kesilgen fiyat daa ziyade artacaq. Eminim ki, böyle areketler Qırımnıñ siyasiy-diplomatik yolnen azat etilmesine ketirir”, – dep ayttı Petro Poroşenko.