Ekinci Cian cenkinde natsizm üzerinde Ğalebe künü munasebeti ile Ukraina Prezidentiniñ beyanatı

Aziz ukrainalılar!

Bügün Ukraina Mayıs 9 Kününi, yani natsizm üzerinde Ğalebe kününi qayd ete.

Bu ğalebeniñ fiyatı deşetli olğanını biz iç bir vaqıt unutmamız. Çeşit türlü tahminlerge köre, eñ azından 50 million qurban, olardan 8 millionğa yaqın ise – elâk olğan ve öldürilgen ukrainalılardır.

O devirniñ deşetlerini hatırlap, cenkke tapınmaymız. Ve bu müim kün reklama tedbiri, şiarlar yarışı, ya da kemikler üzerinde tantanalı oyunlar degildir. Ğalebe kününi yaqınlaştırğan er bir qaramannıñ añılması içün bar sesnen qıçıruv degil de, samimiyet müimdir. Ğalebe er birimizniñ yüregindedir

.

Bu küngece Ekinci cian cenkiniñ veteranlarından pek azı sağ qaldı.

Yazıqlar olsun ki, ekseriy allarda biz olarnı tek böyle mayıs künlerinde hatırlaymız. Albuki olarğa minnetdarlığımıznı er kün bildirmelimiz. Bizim gençligimizniñ olması içün olar öz gençliklerini qurban ettiler.

Gitlerge qarşı küreşken birlik saflarında yedi millionğa yaqın ukrainalı em ana toprağında, em de dünyanıñ çeşit qıtalarında natsizm ile küreşti.

Şübesiz ki, insan cesaretiniñ pasportı yoqtır. Amma ukrainalılar natsizm üzerindeki ğalebege büyük isse qoştı. Ve bügünde-bügün kimse bu ğalebeniñ tek başına saibi olamaz. Ğalebege ukrainalılarsız da irişilecegini aytıp olamaz. Bunu unutmamalımız, bundan utanmamalımız ve öz ukrain qaramanlarımıznıñ cesürliklerini kimsege bağışlamalımız.

Onıñ içün bügün Ukrainanıñ ğururı olğan qaramanlarnı añmalımız.

Olardan biri İvan Kojedubdır. Sovet Birliginiñ Üç Defa Qaramanı, 60-qa yaqın duşman uçağını yoq etken Ekinci cian cenkiniñ eñ güzel üçücisidir.

Olarnıñ arasında Nikolas Oreşkodır. ABD-niñ eñ yüksek arbiy mükâfatları olğan “Allı-güllü yürekniñ” ve Şan-şüret Medaliniñ saibidir. Onı Beyaz evde şahsen ABD Prezidenti Garri Trumen mükâfatlandırğan edi.

Olarnıñ arasında deñiz piyade taqımınıñ birinci ve yekâne qadın komandanı, Kerç ve Aqyar içün uruşlarda iştirak etken Yevdokiya Zavaliydir.

Olarnıñ arasında Golokost devamında onlarnen yeudi balalarını qurtarğan ve dünya milletlerniñ Dürüst insanı unvanını qazanğan Olena Viterdir.

Olarnıñ arasında 30 alman uçağını yoq etken, Sovet Birliginiñ Eki Defa Qaramanı olaraq Altın Yıldızlarnı alğan, qırımtatarlar sürgün etilgende ise öz halqından vazgeçmegen ve onıñ aqları içün küreşken qırımtatarı Amet-Han Sultandır.

Olarnıñ arasında Tetâna Markus. Kiyev şeeriniñ işğali vaqıtında 21 yaşında olıp, onlarnen natsist askerlerini ve zabitlerini yoq etken ve Ukraina qaramanı unvanını qazanğan qadındır.

Olarnıñ arasında efsaneviy T-34 tankını qurğan Harkiv bünyeciler bürosınıñ hadimleridir. Olarnıñ arasında işbu tank vastasınen birinci olaraq Auşvits ölüm lageriniñ qapılarını teşken İgor Pobirçenkodır.

Qan aluv ve yañıdan töküv usulını işlep çıqarğan ve böyleliknen yüz biñlernen yaralı askerlerniñ canlarını qurtarğan akademik Oleksandr Bogomoletstir.

Babin Yarda natsistler tarafından yoq etilgen şaire Olena Teligadır.

16 yaşında keskin nişancı olğan ve cemi olaraq 179 duşmannı yoq etken Vasıl Kurkadır.

Cebe alanından 112 yaralını qurtarıp çıqarğan Mariya Şçerbaçenkodır.

ABD Arbiy-deñiz quvetleriniñ yoq etici gemisine adını bergen Aleks Dâçenkodır.

Sumı vilâyetinde dünyağa kelip, Sovet Birliginiñ bayrağını reyhstağ üzerinde kötergen Oleksiy Beresttir.

Asılı Ukrain lemklerden olğan ve ABD bayrağını İodzimada tiklegen Maykl Strenktir.

Ve cesürliklerinen, fedakârlıqlarınen ve ”Ukrainalılar mıtlaqa ğalege qazanır” degen şıarınen zemaneviy ukrain qorçalayıcılarını ruhlandırğan yüz biñlernen diğer qaramanlarnıñ adlarıdır.

Aziz vatandaşlar!

75 yıl evel natsizm üzerinde ğalebe qazandıq. Mustaqil Ukraina devletimizniñ tiklenmesi içün daa 46 yıl kerek oldı. Ve al-azırda altı yıl devamında biz onı qorçalamaqtamız.

Bu, tarihimizniñ bizni birleştirgen ve daa küçlü yapqan saifeleridir. Bügün, maqsadımızğa inanıp, hatıra işaretleri leyhasını ilân etem. Onıñ çerçivesinde Ukrainada dört çañ tiklemege isteymiz. Tünevin men Lugansk vilâyetinde 1942 senesi Ukrainada birinci olaraq azat etilgen köyniñ yanında bulundım. Anda birinci çañ – Hatıra çañı tiklenecek.

Bügün men Zakarpattâdam, işğalcilerden eñ soñ olaraq azat etilgen yerniñ yanındam. Mında Ğalebe çañı tiklenecek.

Daa eki çañ – Aqmescitte Birlik Çañı ve Donetskte Tınçlıq Çañı tiklenecek kün mıtlaqa kelecegine inanamız ve bü künniñ yaqınlaşması içün qolumızdan kelgenini yapacaqmız.

Ve Ukrainada tınçlıq tiklengen, insanlarımız ve topraqlarımız qaytarılğan künde işbu dört çañ aynı vaqıtta Ukraina tarihında bu müim vaqia yüz bergeni aqqında haber eter.

Ve olarnıñ er bir uruşı tınçlığımıznıñ ve ğalebemizniñ esası birlikte olğanı aqqındaki fikirni esimizde pekitir.

9 Mayıs künü hayırlı olsun! Ğalebe künü hayırlı olsun!

Джерело: офіційне інтернет-представництво Президента України