AHİT Mahsus nezaret etici missiyasınıñ Herson taqımı ile körüşüv

2019 senesi qara qış (yanvar) ayı 15 künü Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini İzet Gdanov AHİT Mahsus nezaret etici missiyasınıñ Herson taqımı ile körüşti.

Körüşüv iştirakçileri Qırım mevzusı, devlet akimiyeti organlarınıñ, yerli öz-özüni idare etüv organlarnıñ ve Qırım boyunca faaliyetlerini yürsetken mahsus vekâletli organlarnıñ ve hızmetlerniñ faaliyeti ve işbirligi ile bağlı olğan bir sıra meselelerni muzakere ettiler.

İzet Gdanov Qırım MC boyunca uquq qorçalav organlarnıñ semereli işbirligini quruv ve nezaret, havfsızlıq, vatandaşlarnıñ aq-uquqlarını qorçalav, mahkeme-protsesual areketlerini becerüv saasındaki faaliyetlerini mükemmeleştirüv maqsadınen olarnı vaqtınca işğal etilgen Qırım civarlarında yerleşken Herson vilâyetinde yerleştirüv oğrunda Temsilcilikniñ esas adımlarını tarif etti.

Birinci muavin aşağıdaki meseleler boyunca Temsilcilikniñ nazar noqtasını aydınlattı:

– memuriy sıñırdan keçken vatandaşlar içün minimal infraterkip seviyesini yaratmaq maqsadınen KÇNN-nı abadanlanlaştıruv;

– memuriy sıñır civarındaki mesken yerlerinde memuriy hızmet merkezlerini teşkil etüv;

– işğal etilgen topraqlarda Ukraina vatandaşlarınıñ aq-uquqlarını bozuv, etnik ukrainalılarğa ve qırımtatarlarğa yapılğan basqı, esassız tintüvlerniñ keçirilüvi, faalcilerniñ taqip etilüvi, Ukrainağa qol tutqan ealini daimiy şekilde qorqutuv ve basqığa oğratuv;

– “Qırım Titanı” halq ögündeki aktsioner cemiyetiniñ faaliyeti neticesinde Ermenibazar şeerinde ve qomşu Herson vilâyetinde yüz bergen ekologik vaziyet;

Qırım MC boyunca Ukraina Havfsızlıq Hızmeti ile beraberlikte Herson vilâyetiniñ Novotroyitsk rayonında, yani Ukrainanıñ nezareti altında bulunğan qıtaiy qısımında yerleşken, Ukrainanıñ vaqtınca işğal etilgen Qırım MC-den elektrik ile temin etilip, Merkeziy Sivaşnıñ tuzlı suvlarını Ukrainanıñ vaqtınca işğal etilgen Qırım toprağında çalışqan ‘Qırım soda zavodı” halq ögündeki aktsioner cemiyeti, ”Brom” halq ögündeki aktsioner cemiyeti kibi şirketlerge teslim etken ”Kutaran benti” pompa stantsiyasınıñ faaliyetiniñ toqtatıluvı içün Temsilcilik tarafından yapılğan adımlar.

İşğalci RF akimiyeti halqara qanunlarnı ve şartlarını bozup, ukrain arbiy gemilerine ücüm etmesi neticesinde yüz bergen vaziyetke de bayağı diqqat ayırıldı.

İzet Gdanov bir kere daa Azaq deñizinde yüz bergen vaziyetke diqqat çekti, deñizni qullanuv boyunca RF ile bütün añlaşmalarnı yañıdan közden keçirmek, halqara deñiz uquq şartları boyunca Azaq deñiziniñ statusını ”eki devletniñ içki suvlarından” ”halqarağa” deñiştirmek kerek olğanını qayd etti.

Körüşüvniñ neticesi olaraq, AHİT Mahsus nezaret etici missiyasındaki Herson taqımınıñ reis muavini Qırım meseleleri boyunca işbirlikni devam etüv boyunca tekliflerinen paylaştı, vaziyetke lâyıq qıymet kesmek maqsadınen Herson taqımınıñ nezaret eticilerini Temsilcilik tarafından teşkil etilgen koordinatsion tedbirlerge celp etmege rica etti.