”Desâte kvitnâ” cemaat teşkilâtınıñ aq qorçalaycılarınen körüşüv

2019 senesi berim (sentâbr) ayı 11 künü Ukraina Prezidentiniñ Qırım MC-deki Daimiy Temsilcisi Anton Korineviç ”Desâte kvitnâ” cemaat teşkilâtınıñ azaları ve aq qorçalaycıları Olğa Tkaçenko, Elvira Zeytulayeva, Anna Naydönova ile iş körüşüvi esnasında qıtaiy Ukrainada qırımlılarğa muntazam şekilde rast kelgen ve qanun seviyesnde çezilmesini talap etken bir sıra memuriy-usuliy meselelerni, bu cümleden yaşav yerini qayd etüv ve şahısnı bilgilev kibi meselelerni muzakere etti.

2019 senesi ”Qırım-Ukraina” leyhası çerçivesinde kiriş kampaniyasına kelgende ise, zenaat saibi olmağa aves etken qırımlılarnıñ ihtiyaclarını qanaatlendirmek maqsadınen oquv yurtlarınıñ ve tıbbiy ve estetik yönelişte zenaatlarnıñ cedvelini kenişletmek kerek olğanına diqqat ayırıldı, bu cümleden, Qırımdan kelecek abituriyentlerge vaqtınca işğal etilgen Qırım MC-ne yaqın olğan regionlarda keyfiyetli umumtasil hızmetlerini berüv, bu cümleden, uzaqtan tasil aluv, azırlav kursları ve bütün sene devamında kütleviy haber kampaniyasını alıp baruv imkânları muzakere etildi.

Körüşüvniñ neticesinde onıñ iştirakçileri kelecekte işbirlik ve qol tutuv yollarını belgilediler, bu cümleden, normativ-uquqiy senetlerni ve olarğa yapılacaq deñişmelerni azırlav, aq qorçalayıcılarnı, adliyecilerni, devlet akimiyet organlarınıñ regional idarelerinde çalışqan memurlarnı celp etip, umumiy tedbirlerni keçirüv aqqında qarar alındı.