İsveçiyanıñ AHİT-da Daimiy eyeti ile körüşüv

2019 senesi çiçek (aprel) ayı 16 künü Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini İzet Gdanov İsveçiyanıñ AHİT-da Daimiy eyetiniñ Elçisi Ulrika Fünered ile diger azalarınen körüşti. Körüşüvde Qırımtatar Milliy Meclisiniñ vekilleri, qırımlı faalciler, ”Desâte kvitnâ” cemaat teşkilâtınıñ temsilcileri de iştirak etti.

Eyetni qabul etken İzet Gdanov İsveçiyağa Ukrainanıñ egemenligine ve topraq bütünligine qol tutqanı içün öz minnetdarlığını bildirdi.

Avropa-Atlantık integratsiyasına umum devlet yönelişiniñ muimligini qayd eter eken, Birinci muavin vaqtınca işğal etilgen Qırımnı eñ yaqın vaqıtta azat etmek maqsadınen Rusiye istilâcısına siyasiy-diplomatik basqını arttırmağa çağırdı.

Körüşüv iştirakçileri vaqtınca işğal etilgen Qırımdaki vaziyetke, ilk nevbette raatsızlağan ve halqara cemiyet tarafından qol tutuvğa muhtac olğan meselelerge esas diqqatlarını ayırdılar.

Davet etilgen Meclis ve cemaat vekilleri qırımtatarlarğa ve etnik ukrainağa qarşı qanunsız taqip etilüvler, basqılar, gibrid sürgün etilüvler, halqara qanuniyetniñ bozuluvı olaraq, vaqtınca işğal etilgen Qırımğa Rusiye vatandaşları köçürülgeni aqqında bildirdi. Qırımdan ve Qırımğa haberlerniñ irişimi, qumanitar meseleleri ve bu cümleden tıbbiy hızmet saasındaki problemalarnı tarif ettiler.

Körüşüvniñ soñunda eyetniñ Elçisi Viyanadaki AHİT missiyası Ukraina seçip alğan yönelişke ve Qırımdaki kerçek vaziyetni aydınlatmaq maqsadınen ortaq munasebetlerge muntazam ve deñişmeycek şekilde qol tutacaqında emin etti.