Saylav esnasını nezaret etken Kanada missiyası ile körüşüv

2019 senesi saban (mart) ayı 6 künü Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini İzet Gdanov 2019 senesi saban ayı 31 künü Ukrainada Prezident saylavlarına azırlıq meseleleri, hususan Ukrainanıñ vaqtınca işğal etilgen Qırım MC-de yaşağan Ukraina vatandaşlarınıñ saylav aqlarına riayet etüv içün mütenasip şaraitlerni yaratuv meseleleri boyunca saylav esnasını nezaret etken ”CANADEM” Kanada missiyası ile iş körüşüvini keçirdi.

Missiya reisi Olâ Odınska-Grod Ukraina Prezidenti nevbetteki saylavları vaqıtında saylav esnasına, Ukraina AHİT ögünde mecburiyetlerini nasıl yerine ketirecegine, demokratik saylavlar boyunca başqa halqara standartlarğa ve milliy qanuniyetke riayet etecegine qıymet kesecek missiyanıñ vekâletleri ile tanıştırdı.

İzet Gdanov öz nevbette Temsilcilikniñ esas vekâletlerini ve faaliyetini taqdim etti, bu cümleden, Ukrainanıñ vaqtınca işğal etilgen Qırım MC topraqlarında yaşağan ya da yarımadadan köçken vatandaşlarınıñ esas aq-uquqlarına ve serbestliklerine riayet etüv, vesiqalarını resmiyleştirüv, Ukrainanıñ vaqtınca işğal etilgen Qırım MC ile memuriy sıñırdan keçüv, vaqtınca işğal etilgen topraqlarda yaşağan Ukraina vatandaşlarınıñ saylav aqlarına riayet etüv ile bağlı olğan meselelerini acele sürette çezilüvi içün mütenasip hızmetlernen ve idarelernen işbirlikni tarif etti.

Körüşüvniñ mevzusı boyunca taraflar işğal etilgen yarımadada yaşap, saylav kününde esas qanun boyunca öz isteginen saylav aqqını riayet etmege niyetlengen Ukraina vatandaşlarınıñ ögüne işğalci akimiyet nasıl maniyalar qoya bilecegini muzakere ettiler.

Körüşüvniñ neticesi olaraq taraflar yuqarıda qayd etilgen meseleler boyunca işbirliklerini devam ettirmege añlaştılar.