Türkiye Cumhuriyetiniñ Baş konsulı ile körüşüv

Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini İzet Gdanov Herson vilâyetinde iş ziyareti ile bulunğan Türkiye Cumhuriyetiniñ Odesa şeerindeki Baş konsulı Sadin Ayyıldız ile iş körüşüvi şekilinde körüşti.

Birinci muavin musafirni Temsilcilikniñ faaliyeti ve Qırım meselesinen oğraşqan vekâletli organlarnıñ ve hızmetlerniñ Qırım MC işğalden azat etilüvi içün strategik ceetten muim olğan Herson vilâyetinde yerleşüviniñ istiqbali ile tanıştırdı.

İşğalci akimiyetniñ qanunsız faaliyeti neticesinde vaqtınca işğal etilgen Qırım MC-deki vaziyetniñ menfiy ketişatı, bu cümleden, Qırımda Ukraina vatandaşlarnıñ ve ilk nevbette Ukrainanıñ topraq bütünligine qol tutqan qırımtatarlarnıñ ve etnik ukrainlerniñ aq-uquqlarını bozuv kibi meseleler tafsilâtlı şekilde muzakere etildi. Qırımnı faal şekilde arbiyleştirüv, yerli eali yerine Rusiye Federatsiyasınıñ vatandaşlarını Qırımda yerleştirüv ve halqara uquqnı bozuv ile arbiy cinayet olaraq sayılğan vaqtınca işğal etilgen Qırımda yaşağan Ukraina vatandaşlarını zorbalıqnen rusiye ordusına çağıruv kibi meselelerge diqqat ayırıldı.

Taraflar Herson vilâyetindeki Qırım MC boyunca mahsus vekâletli organlarğa halqara tehnikiy yardımnı berüv ve vaqtınca işğal etilgen Qırım MC-den Ukrainanıñ qıtaiy qısımına mecburen köçken vatandaşlarnıñ mesken ihtiyaclarını qanaatlendirüv kibi meselelerniñ istiqbalini muzakere ettiler.

Herson vilâyetiniñ yatırım ceetten cazibesi, bu cümleden, yarımadanıñ vaqtınca işğal etilüvi sebebinden Qırımdaki limanlar qapatılğanını diqqatqa alaraq, Herson vilâyetinde limanlarnı ve ticariy gemicilikni inkişaf etüv muzakere etildi.

Körüşüvniñ neticesinde İzet Gdanov Türkiye Cumhuriyetine Ukrainanıñ topraq bütünligine ve egemenligine daimiy şekilde qol tutqanı içün öz minnetdarlığını bildirdi.