Ukrainada Büyük Britaniya Elçihanesiniñ ekinci kâtibi ile körüşüv

2019 senesi oraq (iyül) ayı 4 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç, memleket içinde mecburen köçken insanlarnıñ ve vaqtınca işğal etilgen Qırım MC sakinleriniñ vaziyeti ile tanışmaq maqsadınen Herson vilâyetinde iş ziyareti ile bulunğan Ukrainada Büyük Britaniya Elçihanesiniñ ekinci kâtibi Şivon hanım Rayt ile körüşti.

Körüşüv iştirakçileri vaqtınca işğal etilgen Qırımdaki vaziyetke ve ilk nevbette vaqtınca işğal etilgen topraqlarda yaşağan vatandaşlarnıñ aq-uquqlarını tolu derecede yerine ketirilmesi içün qanuniyet seviyesinde uyğulanmasını talap etken pıtraqlı meselelerge esas qiqqatlarını ayırdılar.

RF işğalci akimiyetniñ aqılsız ve qanunsız areketleri neticesinde Ukrainanıñ vaqtınca işğal etilgen Qırım toprağında yüz bergen içtimaiy-iqtisadiy ve ekologik vaziyet muzakere etildi.

Qırımtatarlarğa ve etnik ukrainalılarğa nisbeten qanunsız taqip etüv, qorqutuv, sıqıştıruv, Rusiye vatandaşlarını vaqtınca işğal etilgen Qırımğa köçürüv kibi halqara uquq şartlarını bozğan adiselerge diqqat celp etildi.

Körüşüvniñ soñunda taraflar bir-birine ürmet bildirdiler, semereli muzakereler içün teşekkür ettiler ve haber saasında kelecekte işbirlik aqqında añlaştılar.