Lehistan Cumhuriyetiniñ Elçihanesinde körüşüv

2018 senesi boş ay (noyabr) 26 künü Ukraina Prezidentiniñ Qırım MC Daimiy Temsilcisi Borıs Babin Temsilcilikteki halqara alâqalar hızmetiniñ hadimleri ile beraber Lehistan Elçihanesinde Missiyanıñ Reis muavini, siyasiy-iqtisadiy bölükniñ reberi Mihal Ğerğon ve Birinci kâtibi Danuta Valetska ile iş körüşüvini keçirdiler.

Körüşüv esnasında esas diqqat Azaq-Qaradeñiz suvlarında Rusiyeniñ Ukrainağa qarşı artqan tecavüzine ayırıldı. Körüşüv devamında Borıs Babin Azaq ve Qara deñizlerinde Rusiyeniñ Ukrainağa qarşı tecavüziy areketleri ve istilâcı devlet tarafından halqara uquqnı qaba şekilde bozuvğa cevap olaraq Ukraina yapqan areketler aqqında haber etti.

Ayrıca Rusiye tarafından başqa halqara uquq qaidelerini bozuv, yani ‘‘Keriç köpüriniñ’’ qurulması, Azaq deñizinde ukrain bayrağı (qaydı) altında yaldağan ticariy ve balıqçı gemilerni qanunsız alda toqtatuv, yaqalav ve teşkerüv, RF-nıñ silâlı küçleri tarafından Azaq deñizi ve Sivaş suvlarında ve vaqtınca işğal etilgen Qırımda balıqçılarnı hırsızlav, olarnı aletlerinden ve avlanğan balıqtan qanunsız alda marum etüv adiseleri, Azaq deñizi ve Sivaş civarlarında RF-nıñ gemilerni ve yer üstündeki küçlerni arttıruv muzakere etildi.

Daimiy Temsilci ‘‘Serbest iqtisadiy «Qırım» zonasını teşkil etüv ve Ukrainanıñ vaqtınca işğal etilgen toprağında iqtisadiy faaliyetniñ hususiyetleri aqqında’’ Ukraina qanunına deral deñişüvler kirsetmege kerek olğanını qayd etti ve bir kere daa RF tarafından ameldeki halqara añlaşmalarnıñ bozuluvını muzakere etti. Körüşüv esnasında istilâcı devletke medeniyetli devletler tarafından sanktsion basqını quvetleştirmege kerek olğanı qayd etildi.