Temsilcilikniñ iş grupassınıñ Hersonda oturışı

2018 senesi qural ay (mayıs) 10 künü Ukraina Prezidentiniñ Qırım MC Daimiy Temsilcisi Borıs Babinnıñ başlığında Temsilcilikniñ vaqtınca işğal etilgen Qırım toprağınen bağlı aktual meselelerniñ çezilüvi boyunca iş gruppasınıñ nevbetteki oturışı olıp keçti. Körüşüv devamında Qırımğa yaqın olğan rayonlarda Memuriy hızmet merkezleriniñ açıluvı, Qırımğa ve Qırımdan qanunsız yolcu naqliyatına qarşılıq kösterüv, Sivaş ve Şimaliy-Qırım kanalı suvlarınıñ işletüvi ile bağlı telükelerni yoq etüv, ‘‘Qırım-Ukraina’’ leyhası çerçivesinde 2018 senesi kiriş kampaniyasına qol tutuv, Ukraina Milliy politsiyanıñ Qırım MC ve Aqyar boyunca Baş idaresiniñ Herson vilâyetinde yerleşüvi ve KÇNN-dan ev ayvanlarını keçirüv meseleleri muzakere etildi.

Muşavereniñ iştirakçileri Novotroyitske qasabasında donatuv tolu derecede alınmağanı ve Çaplınkada donatuvnıñ rayon devlet memuriyeti tarafından yerli cemiyetiniñ balansına keçirilgeni sebeplerinden Mumuriy hızmet merkezleri vaqıtında açılmağanlarını qayd ettiler. Qalançaq ve Novooleksiyivka yerli cemiyetlerniñ temsilcileri çıqışta bulunıp, Memuriy hızmet merkezlerine donatuv almaq içün sermiya qıdırğanlarını bildirdiler. 2018 senesi ilk yaz (iyün) ayında Kahovka ve Oleşki şeerlerinde Memuriy hızmet merkezleri, 2018 senesi qural ay 30 künü Herson şeerinde ‘‘Dokument’’ DM yañı bölügi açılacağı, 2018 senesiniñ soñunace Ukraina Devlet migratsion hızmetiniñ (DMH) Herson vilâyetinde bölüklerinde 20 yañı apparat qoşulacağı aqqında haberler er kesni quvandırdı. DMH bölükleri ya da Memuriy hızmet merkezleri KÇNN-da ya da KÇNN-nıñ yanında vaqtınca işğal etilgen Qırım ile sıñırnıñ özünde yerleşip olamaycağını DMH vekilleri bir kere daa tekrarladı.

Daimiy Temsilci KÇNN-na ve KÇNN-dan resmiy yolcı naqliyatı teşkil etilmegenini kene de hatırlattı, vilâyet ve rayon devlet memuriyetleri ‘‘Qalançaq’’ KÇNN ile Qalançaq, Çaplınka köyleri ve Herson şeeri arasında, ‘‘Çaplınka’’ KÇNN ile Çaplınka köyü ve Geniçesk şeeri arasında yeterli seferlerni ve naqliyat vastalarını temin etüvden çetleşkenlerini qayd etti. Uquq qorçalav organları qanunsız taşımalarğa yeterli derecede qarşılıq köstermegenlerine diqqat etildi.

Sivaşnıñ suvlarında hocalıq faaliyetini yürsetip, vaqtınca işğal etilgen topraqlarınıñ sıñırınen bağlı olğan vesiqalarnı almağa tırışqan ve siyasiy-uquqiy telükeler doğura bilecek şahıslarğa uquq qorçalav organlarnıñ diqqatı çekildi. Bundan da ğayrı, uquq qoruyıcılarnıñ diqqatı işğalci akimiyetke boysunğan müessiselerniñ Ukraina mahkemelerinde mütenasip qararlarnı qabul ettirip, Qırımnı Şimaliy-Qırım kanalı vastasınen suv ile temin etmege ıntılğanlarına celp etildi.

Zaporijya, Odesa ve Herson vilâyetlerinden başlap, Ukraina aliy oquv yurtlarınıñ mütenasip qararları esasında oquv yurtlarınıñ memuriyetleri tarafından Temsilcilikke berilgen içtimaiy reklama malzemelerini vaqtınca işğal etilgen Qırımdan kelgen şahıslarğa darqatmağa yardım etüvde Ukraina Devlet sıñır hızmeti, Devlet migratsiya hızmeti ve Qırım MC ve Aqyar şeeri boyunca Milliy Politsiyanıñ bölüklerinden yardım istenildi.

Uquq qorçalav ve nezaret organlarnıñ diqqatı Ukraina baytar tıbbiyeti boyunca baş devlet müfettişiniñ 2018 senesi saban ayı (mart) 28 künü imzalanğan №31 avalesine çekildi, bu avale boyunca Qırımda yaşağan, ya da memleket içinde Qırımdan köçken Ukraina vatandaşları ev ayvanlarını baytar-sanitar pasportları esasında sıñırdan keçire bileler.

Ayrıca qayd etildi ki, KÇNN-nı keçmek içün ayvanlarğa baytar-sanitar pasportlarından ğayrı iç bir türlü vesiqa (bu cümleden, malümat kâğıdı) kerekmey. Bundan ğayrı 2018 senesi saban ayı (mart) 28 künü imzalanğan №31 avalede baytar-sanitar pasportlarğa, hususan Ukrainanıñ vaqtınca işğal etilgen Qırım topraqlarında şahsiy şirketler tarafından berilgen soylarına, talaplar belgilenmey, onıñ içün bu meseleni tamam ile çezmek maqsadınen Temsilcilik acele sürette normativ vesiqalarğa yapılacaq deñişüvler üstünde çalışmağa başlaycaq. Aynı vaqıtta Ukraina qanuniyeti boyunca Ukrainanıñ nezareti altında bulunğan topraqlarda resmiyleştirilgen baytar-sanitar pasportlar esasında, şübesiz ki, ev ayvanlarını saipleri ile beraberlikte KÇNN-dan keçirmege mümkündir.