Ukraina çetel işler Nazirliginiñ ukrain gemicilerniñ aq-uquqlarını qorçalav boyunca tedbirleri

2018 senesi boş ay (noyabr) 27 künü Ukraina çetel işler Nazirligi, boş ay 25 künü Rusiyeniñ Ukrainağa qarşı qanunsız areketleri ve nevbetteki istilâiy basqısı neticesinde Ukraina Silâlı Quvetleri Arbiy-deñiz Quvetleriniñ arbiyleri, ‘‘Berdânsk’’, ‘‘Nikopol’’ katerleriniñ ve ‘‘Yañı qapu’’ buksiriniñ taqımları devletimizniñ Qara deñizdeki territorial suvlarında ve mahsus iqtisadiy zonasında esirge alınğanı sebebinden istilâcı devletniñ çetel işler Nazirligine narazlıq notasını yolladı.

Rusiye tarafından zapt etilgen Ukraina vatandaşlarını deral azat etip, olarğa iç bir türli zarar ketirmeden Vatanlarına qaytarıluvı talap etildi. Ukrain tarafı arbiy esirler ile davranuv aqqında 1949 senesi arman (avgust) ayı 12 künü imzalanğan Jeneva konventsiyası boyunca, RF tarafından zapt etilgen Ukraina vatandaşlarınıñ qanuniy aq-uquqları deral ve tolu kolemde temin etilmesini ve olarnıñ Qızıl Haç Halqara Komiteti temsilcileri tarafından ziyaret etilüvine ruhset berilmesini bir kere daa talap etti.

Aynı şu künü Ukraina çetel işler Nazirligi Ukraina ve RF arasında davanı baqqan Arbitraj Tribunalına Qara deñizde, Azaq deñizinde ve Keriç boğazında deñiz uquqı boyunca BMT Konventsiyasını bozğan, taraflar arasında vaziyetni daa ziyade kerginleştirgen Rusiyeniñ yañı areketleri aqqında haber etti. Keriç boğazından keçip, Mariupolge, Berdânskke ve başqa ukrain limanlarına areket etken ukrain ve çetelden gemilerniñ devamlı şekilde toqtatılıp taqip etilüvine Ukraina diqqat çekti.

Rusiye öz areketleri ile Keriç boğazını bütün gemiler içün qapattı. Ukraina ve Qara deñiz yalısında yerleşken başqa devletler, bu cümleden, Avropa Birligi ile Türkiye, böyle areketlerni qattı şekilde takbih etti ve RF-ten Keriç boğazından keçüv serbestligine riayet etmesini talap eteler.

Ukrain gemilerine qarşı ateşniñ açılması ve olarnıñ zapt etilüvi kibi soñki areketler Rusiye vaziyetni aselet kerginleştirgenini, gemicilik içün manialar yaratqanını, Ukraina ve üçünci devletlerniñ bayraqları altında yaldağan gemilerni aqsız yerde ve devamlı şekilde toqtatıp, olarğa ciddiy iqtisadiy zarar ketirgenini tasdıqlay. Şunı da qayd etmek kerek ki, yalıñız ukrain limanlarına areket etken gemiler sebepsiz toqtatıla, Azaq deñizindeki Rusiye limanlarına areket etken gemilerge ise iç bir türlü sıñırlavlar üküm sürmey.

Ukraina Rusiyeniñ areketlerine qarşı öz narazlığını bildirdi, narazlığı aqqında öz ittifaqdaşlarına haber etti ve Arbitraj Tribunalına muracaat etip, bütün mümkün olğan uquqiy vastalarnı qullanıp, Rusiyeniñ areketlerine qarşılıq kösterecegini beyan etti.