Milliy menfaatlarımıznıñ qorçalavı oğrunda acele tedbirler

2018 senesi ekim (oktâbr) ayı 12 künü Ukraina Prezidenti öz Fermanı ile Ukraina Milliy Mudafaa ve Havfsızıq Şurasınıñ ‘‘Ukrainanıñ Cenübinde ve Şarqında, Qara ile Azaq deñizlerinde ve Keriç boğazında milliy menfaatlarnı qorçalav boyunca acele tedbirler aqqında’’ 320/2018 sanlı Qararını amelge keçirdi.

Qararda RF Azaq deñizinde ve Keriç boğazında işbirlik aqqında halqara añlaşmalarnı suistimal etkeni, deñiz suvlarınen bölüşüv boyunca öz şartlarını qoyğanı, Ukrainanıñ liman ve balıqçılıq faaliyetlerini sıñırlağanı, Ukrainanıñ vaqtınca işğal etilgen topraqlarında ve bu cümleden Qara ile Azaq deñizleriniñ yalılarında qanunsız şekilde faydalı malzemelerni qıdırğanı ve istisal etkeni, Ukrainanıñ (deñiz) iqtisadiy zonasında ve içki deñizinde qanunsız alda deñiz mahsulatlarını tutqanı sebebinden Ukrainada iqtisadiy ve içtimaiy-siyasiy vaziyetni istiqrarsızlıqqa, deñiz yalısınıñ ablukasına ketire bilecek şartlar mevcut olğanı qayd etildi.

Qarar Ukraina Ukümetine vaqtınca işğal etilgen Qırım MC-niñ şimalindeki vaqialarnıñ tabiatqa tesir etüvni teşkermege, tabiatnı kirletüv ve Ukraina vatandaşlarınıñ ekologik aqlarını bozuv adisesinden ve ‘‘Qırım titanı’’ zavodınıñ bu faciağa ihtimalı olğan alâqasından hulâsalarnı çıqarmağa, aktual ekologik haberlerni beyan etmege, vatandaşlarnıñ sağlığına ve mal-mülküne menfiy tesir etüvge yol berilmemesi içün kerekli tedibirlerni yapmağa ve ketirilgen zararlarnıñ ödenmesi içün qanun ile belgilengen şekilde mütenasip uquqiy yardımnı bermege avale ete.

Bundan da ğayrı, RF tecavüziy areketleri neticesinde yüz bere bilecek buhran telükelerini eksiltmek maqsadınen Nazirler Şurasına Donetsk, Zaporijya, Mıkolayiv, Odesa ve Herson vilâyetlerindeki devlet memuriyetleri ile beraberlikte Ukraina Havfsızlıq Hızmetiniñ iştiragi ile devlet akimiyeti organları, öz-özüni idare etüv organlar ve Ukrainanıñ içki suvlarında, içki deñiz suvlarında, territorial deñizinde, qıta yalısında, mahsus (deñiz) iqtisadiy zonasında ve açıq deñizde hocalıq faaliyeti ile oğraşqan subyektler arasında işbirlik usulını meydanğa ketirmege avale etile.

Ukraina Ukümeti deñiz yalısında yerleşken memleket olaraq 1982 senesi deñiz uquqı boyunca BMT Konventsiyası ile belgilengen Ukrainanıñ mesüliyetlerini yerine ketirüvni temin etmeli, Ukrainanıñ territorial deñizinde, içki suvlarında, Qara ile Azaq deñizlerinde ve Keriç boğazında RF tecavüziy areketleri ve Ukraina topraqlarıniñ qısmen vaqtınca işğal etilüvi neticesinde gemicilik içün mevcüt olğan havflar aqqında haberdar etmelidir.

Bundan da ğayrı, Nazirler Şurası bir ay içinde  RF Qara ile Azaq deñizlerinde ve Keriç boğazında Ukrainanıñ iqtisadiy faaliyetini mürekkepleştirgen şartlarnı yaratqanını talil etmeli ve talilniñ neticesi olaraq içtimaiy-iqtisadiy vaziyetni tüzleştirüv, hocalıq faaliyetini canlandıruv ve yatırımlarnı celp etüv boyunca tedbirler keçirmelidir.

Ukraina Çetel işler Nazirligine qanuniyetke binaen BMT Kâtibiyetini ve RF-nı haberdar etip, eki taraflama añlaşmanıñ imzalanlamasından evel ayıruv çizgisi olaraq hızmet etken ve böyleliknen Ukraina ile Rusiye arasında Azaq ile Qara deñizinde ve Keriç boğazinda devlet sıñırını temsil etken orta çizginiñ koordinatlarını beyan etmege avale etile. Ukraina infraterkip Nazirligine Qarar ile bir ay içinde Azaq deñizinde ve Keriç boğazında RF tecavüziy areketleri neticesinde meydanğa kelgen kergin vaziyetni diqqatqa alaraq Ukrainanıñ Azaq deñizindeki limanlarğa ve işbu limanlardan areket etip, Keriç boğazından keçken ukrain ve başqa gemiler içün lotsman hızmetleri teşkil etmege avale etile.

Ukraina ekologiya ve tabiat resursları Nazirligine vaqtınca işğal etilgen topraqlar ve devlet içinde köçken şahıslar meseleleri boyunca Ukraina Nazirligi ile beraber Ukrainanıñ vaqtınca işğal etilgen topraqlarında, Qırım ile Azaq deñizlerinde ekologiya havfsızlığı talaplarına riayet etmek maqsadınen halqara teşkilatlarnı celp etip etrafraki muitniñ közetüvini teşkil etmege avale etile.