Temsilcilikniñ alâqa ve informatizatsıya meseleleri boyunca parlament Komiteti ile işbirligi

2018 senesi berim (sentâbr) ayı 18 künü Ukraina Prezidentiniñ Qırım MC Daimiy Temsilcisi Borıs Babin alâqa ve informatizatsıya meseleleri boyunca parlament Komitetiniñ oturışında Ukrainanıñ vaqtınca işğal etilgen Qırım toprağında yayınlav, matbuat, informatizatsıya ve elektron ağlarnıñ vaziyeti boyunca çıqışta bulundı.

Komitetniñ oturışında, onıñ azalarından ğayrı, elektron vastalarnen idare etüv meseleleri boyunca Ukraina Devlet agentliginiñ Başlığı, radio yayınlav Kontserniñ Müdiri, mahsus alâqa ve malümat qorçalav boyunca Ukraina Devlet hızmetiniñ Müdiri, alâqa ve infromatizatsıya saalarında devlet idare etüvi ile oğraşqan Milliy komissiyada alâqa bölüginiñ Müdiri, Ukraina vaqtınca işğal etilgen topraqlar ve memleket içinde köçken şahıslar meseleleri boyunca Nazirlikteki idareniñ müdir muavini, diger devlet akimiyet organlarınıñ vekilleri iştirak etti.

Borıs Babin öz çıqışında istilâci devlet işğal etilgen topraqlarda öz informatsion ağlarını, Qırımda çalışqan telefon tertibatlarını, matbuat, poçta vastalarını, tele ve radio yayınlavını teşkil etkenini bildirdi. Vaqtınca işğal etilgen topraqlardan qanunsız yayınlavnıñ Herson vilâyetiniñ rayonlarına keñişletüvge, ‘‘Ukrpoşta’’ müessisesi tarafından işğal etilgen Qırımdan yollanmalarnı qabul etüvge, bu saada sanktsıyalar siyasetiniñ semereligini arttıruv imkânlarına ayrıca diqqat etildi. Tedbir esnasında Komitet azaları mevcut olğan vaziyetke milliy seviyede teşkiliy ve uquqiy tesir etüv yollarını, istilâci devletke informatizatsıya ve alâqa saalarında halqara vastalarnen tesir etüv imkânları muzakere ettiler.

Maruzanıñ neticesi olaraq Komitet Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarını qorçalav boyunca 2018-2019 seneleri içün acele areket Planınıñ mütenasip vazifelerine ve parlament tarafından kelecekte yapılacaq bir sıra tedbirlerge qol tuttı.