Qırımtatar halqınıñ sürgün etilüvini genotsid olaraq tanuv

2019 senesi qural ay (mayıs) 16 künü ”Ukrinform” haber agentliginiñ binasında Qırımtatar Milliy Meclis azalarınıñ, Ukraina Prezidentiniñ Qırım MC Temsilciliginiñ Kıyiv şeerindeki ofis hadimleriniñ, Qırım MC Savcılığı vekilleriniñ, alimlerniñ, adliyecilerniñ, tarihçilerniñ, cemaat erbaplarınıñ iştiragi ile ”Qırımtatar halqı sürgünliginiñ 75-yıllığı: neticeler ve Ukraina mahkeme organları tarafından genotsid olaraq tanılmasınıñ imkâniyeti” mevzusında Qırımtatar resurs merkezi teşkil etken tögerek masa olıp keçti.

Tedbir iştirakçileri qırımtatar halqınıñ sürgün etilüvine halqara ve milliy standartlar boyunca cinaiy qıymet kesüv, Qırım MC Savcılığınıñ bu yönelişteki faaliyeti ve insaniyetlikke qarşı bu sovet cinayetini taqiq etüvde halqara işbirlik kibi meselelerni muzakere ettiler.

Temsilcilikteki halqara alâqalar hızmetiniñ reisi Yevgen Samuha öz çıqışında taqiqatçılarnı beklenilmegen şekilde areket etmege, genotsidni isbatlağan maddiy delillerni başqa yollarnen qırıdırmağa çağırdı, çünki sovet rejiminiñ mirasçısı olğan RF halqara uquqiy yardım çerçivesinde iç bir vaqıt ukrain savcılığına sürgünlikniñ esasları ve şaraitleri boyunca arhiv malümatlarını teslim etmez.