Qırım mezunları içün haber

2019 senesi qural ay (mayıs) 11 künü saat 12:00-de Herson devlet deñiz akademiyasınıñ binasında (Herson şeeri, Uşakov caddesi, 20 sanlı ev), temellerinde ”Qırım-Ukraina” tasil merkezleri teşkil etilgen ve Qırım Muhtar Cumhuriyetinde oquğan mezunlarnı qolaylaştırılğan usulnen oquvğa almağa niyetlengen Ukraina aliy oquv yurtları Açıq qapılar kününi keçirmege planlaştıra.

Açıq qapılar kününde 35 universitetniñ vekilleri, Ukraina Prezidentiniñ Qırım MC Temsilciliginiñ, Ukraina tasil ve ilim Nazirliginiñ, vaqtınca işğal etilgen toraqlar ve memleket içinde köçip kelgenler meseleleri boyunca Ukraina nazirliginiñ, Ukraina devlet migratsiya Hızmetiniñ ve Ukraina devlet sıñır hızmetiniñ hadimleri iştirak etecek. Tedbirde bulunğanlar leyhada iştirak etken aliy oquv yurtları aqqında malümat alıp, devlet akimiyeti organlarınıñ vekillerine öz suallerini bere bilirler.