Almaniyanıñ Ukrainadaki Eçlihanesinde uquqiy-konsul bölüginiñ reisi ile körüşüv

2019 senesi qural ay (mayıs) 17 künü Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini İzet Gdanov, Herson vilâyetinde bulunıp, memleket içinde köçken şahıslarnıñ ve işğal etilgen Qırım MC şakinleriniñ vaziyetlerini nezaret etken Almaniya Federativ Cumhuriyetiniñ Ukrainadaki Eçlihanesinde uquqiy-konsul bölüginiñ reisi Yens bey Kraus-Masse ile körüşti.

Selâmlaşuv esnasında İzet Gdanov Ukrainanıñ egemenligine ve topraq bütünligine daimiy şekilde qol tutqan Almaniya Federativ Cumhuriyetine minnetdarlığını bildirdi. Devletlerimizniñ arasındaki munasebetleriniñ tışqı-siyasiy yönelişlerni müzakere etüv esnasında Birinci muavin işğalci devletke halqara basqını arttırmağa, vaqtınca işğal etilgen topraqlarnen iqtisadiy munasebetlerge yol bermemege, Rusiye haber propagandasına qarşılıq köstermege kerek olğanını qayd etti.

Körüşüv iştirakçileri vaqtınca işğal etilgen Qırımdaki vaziyetke ve ilk nevbette vaqtınca işğal etilgen topraqlarda yaşağan vatandaşlarnıñ aq-uquqlarına riayet etmek maqsadınen Ukrainada qanuniy seviyede çezilmesini talap etken meselelerge esas diqqatlarını ayırdılar. Qırımtatarlar ve etnik ukrainler kütleviy ve maqsatkâr şekilde taqip etilgenine ve qorqutılğanına, vaqtınca işğal etilgen Qırımğa Rusiye vatandaşları köçürilgenine, RF Silâlı Quvetlerine qırımlılar qanunsız şekilde çağırılğanına, gidrid sürgünlikke dair misaller ketirildi, işğalci akimiyetniñ 75 yıl evelsi Ukrainada genotsid olaraq tanılğan qırımtatarlarnıñ sürgün etilmesi ile temeli atılğan сezalav areketlerine ayrıca diqqat etildi.

Yens bey Kraus-Masse halqara uquqnı bozmağa mümkün olmağanını, Almaniya Qırımnı ilhaq etmek ıntıluvını tanımayacağını ve Ukrainağa daimiy şekilde qol tutacağını qayd etti.

Körüşüvniñ soñunda taraflar bir-birine ürmet bildirdiler, semereli muzakereler içün teşekkür ettiler ve haber saasında kelecekte işbirlik aqqında añlaştılar.