Volodımır Zelenskıy Donbasta, Qırımda ve Rusiyede tutulğan ukrainalılarnı azat etüvde yardım istep, Papa Frantsıska muracaat etti

Ukraina Prezidenti Volodımır Zelenskıy ömür arqadaşı Olena ile Vatikanda Papa Aziz Frantsısk ile körüşti.

Devlet başlığı Ukraina topraqlarına tınçlıq ketirüv meselesinde Aziz Taht müim vazife becere bilecegini qayd etti.

«Muzakere etilgen meselelerden eñ müimi – tınçlıqtır. O, meni «tınçlıq Prezidenti» olaraq adlandırdı – işte Avropada şimdi itibarım böyledir», – dep bildirdi körüşüvden soñ Volodımır Zelenskıy.

Ukraina Prezidentiniñ aytqanına köre, Papa Frantsizk ile körüşüv Normand formatında Parijdeki samitten eki ay keçken soñ ve Berlinde planlaştırılğan körüşüvden evel olıp keçkeni müimdir.

«Papa Frantsiska Donbasta, Qırımda ve Rusiyede tutulğan ukrainalılarnı azat etüvde yardım istep, muracaat ettim», – dep ayttı o.

Bundan ğayrı, Ukraina devletiniñ Başlığı ve Aziz Frantsısk balalarğa yardım etüvge ve tabiatnı qorçalavğa bağışlanğan gumanitar teşebbüslerni muzakere ettiler.

”Donbasta zarar körgen 900 biñ ukrainalılarğa yardım etken ”Papadan Ukrainağa” teşebbüsi içün Aziz Frantsıskka soñsız minnetdarlığımnı bildirem”, – dep qayd etti Volodımır Zelenskıy.

Devlet başlığı, ukrain kilisileri kerçekni aydınlatuvda ve cemiyetni inkişaf etüvde müim röl oynağanını qayd etti.

Prezident Papa Aziz Frantsısk Ukrainada fevqulâde derecede ürmet etilgenini, insanlar oña işanğanını ve onı pek beklegenini qayd etti.

”Men onı Ukrainağa davet ettim. Eminim ki, o, Ukrainağa kelir ve başkentten ğayrı, başqa yerlerni de ziyaret eter. Oña ayttım ki, şarqımızda neler olıp keçkenini tolu şekilde añlamaq içün, şarqqa barıp kelmesi kerek”, – dep yekünledi Volodımır Zelenskıy.

Menba: Ukraina Prezidentiniñ Internette resmiy temsilciligi