Volodımır Zelenskıy: Ukrainalılar öz menligini qorçalamağa ve serbestlikleri içün küreşmege aqiqaten de bileler

Menlik ve Serbestlik Kününde Prezident Volodımır Zelenskıy yañı Ukrainanı beraberlikte qurmaq içün vatandaşlarnı birlikke çağırdı.

”Menlik ve Serbestlik Künü er birimiz içün müimdir. O, eki inqlâpnıñ başlanuvınen bağlı, o zaman millionlarnen vatandaşlarnıñ sesleri milletniñ yekâne sesine çevirilip, ukrainalılar serbest, demokratik ve bereketli devlette yaşamağa istegenlerini ve yaşaycaqlarını bildirdi. Menlik ve serbestlik bizim DNEmizniñ ayırılmaz qısımıdır. Onıñ içün ukrainalılar barikadlarda öz menligini qorçalamağa ve serbestlikleri içün küreşmege aqiqaten de bileler. Yazıqlar olsun ki, bu küreşte biz fiyatlardan eñ yüksegini ödedik, yani insanlar öz ayatlarını ğayıp etti”, – Kıyiv şeerinde Menlik ve Serbestlik Künü munasebetinen keçirilgen tedbirlerde dep qayd etti Ukraina Prezidenti.

Devlet başlığı Kök Yüzlügi Qaramanları soqağında mıtlaqa Menlik İnqlâbı Müzeyi qurulacağını bildirdi.

”Bu pek müim mesele”, – dep qayd etti o.

Prezident aytqanına köre, qıyın vaqıtlarda ukrainalılar daima şaşılacaq birlik ile birdemlikni numayış eteler.

”Yaş, til ve din boyunca ayırılmayıp, bir-birimiz içün turamız. Ve bügünde-bügün devletimizni qorçalamaq içün, mustaqilligimiz, serbestligimiz ve öz qollarımıznen öz kelecegimizni, balalarımızğa miras olaraq qalacaq memleketniñ kelecegini mustaqil şekilde saylay bilmemiz içün kene de böyle birlikke muhtaçmız. Bularnıñ episi bizni birleştirmeli”, – dep ayttı Volodımır Zelenskıy.

Devlet başlığı ömür arqadaşı Olena ve Ukraina Baş naziri Oleksiy Gonçaruk ile beraberlikte ”M3: Maydan. Memorial. Müzey” sergisini ve Menlik İnqlâbınıñ esas vaqiaları olıp keçken yerlerni numayış etken haritanı seyir etti.

Bundan ğayrı, añuv tedbiriniñ iştirakçılarına ”Kelecekni yaratuvda sebestler” video leyhası numayış etildi.