”Qırım ile avtobus, demiryol ve ava vastasınen naqliyat, onı suv ile teminlev yalıñız Qırım işğalden azat etilgenden soñ mümkün olacaq. Bu, daimiy nezaretimizde bulunğan prinsipial meseledir”, – dep qayd etti ”ATR” telekanalına bergen intervyusında İzet Gdanov

Ukraina Prezidenti Temsilciligi sırf memuriy sıñırdan keçüvni qolaylaştırmaq maqsadınen 2017 senesinden berli ”Çonğar” ve ”Qalançaq” kiriş-çıqış nezaret-keçirüv noqtalarını minimal şekilde abadanlaştırmağa talap etmekte.

İlk-evelâ icra akimiyet ve yerli öz-özüni idare etüv organları KÇNN-ge yaqın olğan stantsiyalarğa qadar doğru demiryol ve qanuniy yolcu naqliyatını teşkil etmeli. Qırım yönelişinde qanuniy naqliyat meselesi tek devletimizniñ milliy havfsızlığı meselesinen bağlıdır.

Onıñ içün, buña vekâletleri olğan mütenasip akimiyet organlarınıñ ve transport nezareti organlarınıñ areketsizligini añlamaq mümkün degil.

KÇNN yarıq, ana ve bala odası, mütenasip yol töşemesi, suv ile teminlev, saçaqlar, sanitar bölümini abadanlaştıruv ve ilâhre hızmetlerge muhtac. Bunıñ yapılması büyük para talap etmey.

Aynı vaqıtta İzet Gdanov emin ki, memuriy hızmet merkezleri KÇNN-niñ özünde degil de, qomşu mesken yerlerde olmalı, Temsilcilik bu yönelişte daimiy şekilde çalışmaqta ve al-azırda müsbet neticelerge irişti.

”KÇNN-de turğun cemaat aşayt noqtaları, büyük avtobus duraqları, yataqhaneler ve müzeyler de qurulmamalı”, – dep qayd etti Birinci muavin.