Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini İzet Gdanovnıñ, vaqtınca işğal etilgen Qırım Muhtar Cumhuriyeti ve Aqyar şeeri boyunca ilerideki siyasetke dair Ukraina Prezidenti Volodımır Zelenskiy adına açıq mektübi

Ukraina Prezidenti

Zelenskiy V.O.

Açıq mektüp

Ürmetli Volodımır Oleksandrovıch!

Ukraina Prezidentiniñ Qırım Muhtar Cumhuriyetindeki Temsilciligi (ileride – Temsilcilik) ”Qırım Muhtar Cumhuriyetinde Ukraina Prezidentiniñ Temsilciligi aqqında” Ukraina Qanunına binaen, Qırım Muhtar Cumhuriyetinde Ukraina Prezidenti vekâletleriniñ yerine ketirilmesine qol tutmaq maqsadınen Ukraina Esas qanunı boyunca teşkil etildi.

Yuqarıda añılğan qanunnıñ 2-nci maddesine binaen, Temsilcilik Ukraina Prezidenti tarafından teşkil etilip, oña doğrudan-doğru boysuna.

Prezident Memuriyeti Temsilcilikniñ faaliyeti ile bağlı meselelerni ve vaqtınca işğal etilgen Qırımdaki vaziyet aqqında yazılğan ve iş körüşüvleri esnasında muzakere etilgen malümatlarnı körmemezlikke urğanı sebebinden, Sizge halq ögünde muracaat etmege mecburım.

Belli (yarım yıldan ziyade) bir vaqıt müddeti devamında Ukraina Prezidentiniñ mesüliyetinde bulunğan teşkiliy-kadro meseleleri boyunca qararlar alınmağanı sebebinden, Temsilcilikniñ faaliyeti bayağı sıñırlı edi.

Rusiye Federatsiyasınıñ Ukrainağa qarşı silâlı tecavüzi açıq şekilde 2014 senesi Qırımnıñ işğal etilüvi ve qanunsız alda ilhaq etilüvi ile başlanğan edi.

Devletimizniñ topraq bütünligine alıp ketecek yol Ukraina devlet egemenligini vaqtınca işğal etilgen Qırımda ve Donetsk ile Lugansk vilâyetleriniñ vaqtınca işğal etilgen topraqlarında ğayrıdan tiklev ile bağlı olğanı sebebinden, Qırımnıñ işğalden azat etilüvi boyunca strategik planlaştıruv, işğalci memleketniñ Qırımdaki Ukraina vatandaşlarına qarşı kütleviy ve maqsadlı cezalavlarına muntazam şekilde qarşılıq kösterüv, vaqtınca işğal etilgen Qırımda yaşağan Ukraina vatandaşlarınıñ aq-uquqlarını qorçalav kibi meselelerni ekinci, üçünci, onuncı yerge nevbetke qoymaq ya da atta körmemezlikke urmaq mümkün degildir.

Ürmetli Ukraina Prezidenti, eñ yaqın vaqıtta vaqtınca işğal etilgen Qırım Muhtar Cumhuriyeti ve Aqyar şeeri boyunca ilerideki siyasetke binaen muşavere teşkil etip, bu muşaverege Ukraina Prezidentiniñ Qırım Muhtar Cumhuriyetindeki Temsilciliginiñ reberiyetini davet etmeñizni rica etem.

Ürmet ile

Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini

İzet Gdanov