NATO ile işbirlik boyunca yüksek seviyede halqara konferentsiyada iştirak etüv

2018 senesi boş ay (noyabr) 7-8 künleri Kıyiv şeerindeki G. Udovenko adına Ukraina Diplomatiya akademiyasında Ukraina-NATO platforması çerçivesinde Avropa ve Avropa-atlantik integratsiyasını koordinatsiya etüv ofisi ve Ukraina çetel işler Nazirligi tarafından teşkil etilgen ‘‘Gibrid onyıllıqnıñ dersleri: ögge muvafaqiyetli areket etmek içün nelerni bilmek kerek’’ mevzusında yüksek seviyede halqara konferentsiya olıp keçti.

Konferentsiyanı açqan Ukraina Prezidenti Petro Poroşenko öz çıqışında gibrid cenkiniñ tam ucunda bulunğan Ukraina başqa devletlernen paylaşa bilecek tecribege saip olğanını qayd etti. ‘‘İnformatsion ucumlar, embargo ve ticaretni tamamen toqtatuv, energetik qamaçav, devlette istiqrarsızlıq, diniy teşkilâtlar vastasınen tesir etüv –Ukrainağa qarşı  Rusiye gibrid cenkiniñ tolu olmağan cedvelidir. Ne de olsa, biz bularnıñ episine qarşılıq köstermege ögrendik, asılında Ukraina – NATO-nıñ şarqiy cebesidir.

Gibrid cenkiniñ siyasiy, arbiy, informatsion tarafları ve bu cümleden, kiber telükeler, mahsus hızmetlerniñ faaliyeti boyunca çeşit türlü munaqaşalarda ukrain ve çetelden kelgen memurlar ve dünya seviyesinde ekspertler havfsızlıq meselelerge ve bu cümleden Ukrainanıñ avropalı ve avropa-atlantik ortaqları ile işbirligine ertaraflama ve umumiy yanaşuvlarnı muzakere ettiler.

Konferentsiyada Ukraina Yuqarı Şurasınıñ Başlığı Andriy Parubiy, Ukraina Baş Naziriniñ Avropa ve Avropa-atlantik integratsiyası meseleleri boyunca muavini İvanna Klımpuş-Tsıntsadze, halq deputatları, Havfsızlıq ve Mudafaa Şurasınıñ, mudafaa Nazirliginiñ, çetel işler Nazirliginiñ, haber siyaseti Nazirliginiñ, vaqtınca işğal etilgen topraqlar boyunca Ukraina Nazirliginiñ, Ukraina Havfsızlıq Hızmetiniñ ve mahsus alâqa Devlet hızmetiniñ yolbaşçıları, Ukraina Prezidentiniñ Muşaviri Volodımır Gorbulin, sabıq Ukraina Baş Naziri Yevgen Marçuk, NATO Baş kâtibiniñ yañı havfsızlıq çağıruvlar boyunca yardımcısı Antonio Missiroli, sabıq Latviya Prezidenti Valdis Zatlers, Finlândiya çetel işler Nazirliginiñ gibrid telükeler boyunca Elçisi Mikko Kinnunen, Rigada NATO strategik kommunikatsiyalar Merkeziniñ müdiri Yanis Sarts ve başqaları çıqışta bulundı. Ukraina Prezidentiniñ Qırım MC Temsilciliginden tedbirde halqara alâqalar hızmetiniñ reisi Yevgen Samuha iştirak etti.