Bazar künü, 2019 senesi berim (sentâbr) ayı 8 künü, vaqtınca işğal etilgen Qırımda işğalci akimiyet sözde ”Qırım Cumhuriyeti Devlet şurasına” ve ”yerli şuralarğa” deputat saylavlarını keçirmege niyetlene

Qırım Muhtar Cumhuriyeti Ukraina topraqlarınıñ ayırılmaz parçası olğanını hatırlatamız.

Bunın içün, Qırım MC topraqlarında qanuniy şekilde tek Ukraina akimiyet organlarına saylavlar keçirile bile.

Rusiye Federatsiyası işğalci devlet olaraq Qırım MC topraqlarında naslıdır ”saylav ceryanlarını” keçirmek aqqına malik degil, Qırım topraqlarında bütün RF ”akimiyet organları” ise qanunsız ve aqsızdır. Qırım MC topraqlarında RF ”akimiyet organlarına” keçirilgen bir-de-bir saylavlar, halqara uquqnıñ ciddiy bozuluvıdır.

Halqara cemiyetni işbu ”saylavlarnıñ” neticelerini tanımamağa ve işğalci devletniñ ”akimiyet organlarınen” ve memurlarınen resmiy munasebetlerde bulunmamağa çağıramız.

Vaqtınca işğal etilgen Qırımda yaşağan vatandaşlarımıznı Ukrainanıñ vaqtınca işğal etilgen Qırım MC ve Aqyar şeerinde qanunsız şekilde keçirilgen saylavlarda iştirak etmemege çağıramız.