Memleket içinde köçken şahıslarnıñ içtimaiy aqları boyunca trening

2018 senesi boş ay (noyabr) 16 künü Ukraina Prezidentiniñ Qırım MC Temsilciligindeki uquqiy talil hızmetiniñ baş mesleatçısı Ruslan Seydametov qaçaqlar meseleleri boyunca BMT Agentliginiñ ve ‘‘Sıñırsız’’ Leyha cemaat teşkilâtınıñ ‘‘Matbuat vastaları ve davalar ile cenkler sebebinden evlerini terk etmege mecbur olğan adamlar meseleleri’’ mevzusındaki treninginde çıqışta bulundı.

Treningde BMT qaçaqlar işleri boyunca Yuqarı Komissar İdaresiniñ (QİBYKİ) vekili Pablo Mateu, Ukrainada BMT QİBYKİ Vekiliniñ muavini Noyel Kalhun, Ukrainada Avropa Birligi Temsilciliginiñ reisi Hüg Mingarelli, aq qorçalayıcılar, jurnalistler ve blogerler iştirak etti.

Trening esnasında bir sıra uquqiy ve içtimaiy meseleler, bu cümleden, memleket içinde köçip, Ukrainanıñ çeşit regionlarda yaşağan şahıslarnıñ imkânlarını keñişletüv maqsadınen olarnı içtimaiy mesken, para yardımı, grantlar ile teminlev ve BMT QİBYKİ leyhalarını amelge keçirüv muzakere etildi. Vatandaşlıqları olmağan şahıslar meselesi ve onı çezüv yolları da muzakere etildi.

Ruslan Seydametov Temsilcilikniñ kündelik faaliyeti, vaqtınca işğal etilgen Qırım civarlarında yerleşken rayonlarda Memuriy hızmet merkezlerni teşkil etüv, qırımlılarnı mesken ile temin etüv, vaqtınca işğal etilgen topraqlarnıñ sakinlerine Ukraina qıtasında memuriy, naqliy, tıbbiy ve tasil hızmetleriniñ berilüvi aqqında ikâye etti. Temsilcilikniñ qanun yaratıcılıq saasındaki faaliyeti, bu cümleden, vaqtınca işğal etilgen Qırımda ölüm adiselerini qayd etüv, yarımada sakinlerine bedava ekinci nevbet uquqiy yardımnı berüv, qırımlılarnıñ adliyege irişimlerini qolaylaştıruv boyunca azırlanğan qanun leyhaları aqqında bildirdi. Ayrıca memleket içinde köçken şahıslarnıñ saylavlarda iştirak etüv aqlarını temin etüv meselesi ve Temsilcilikniñ bu yönelişteki adımları muzakere etildi.