Siyasiy sebeplerden taqip etilgen Ukraina vatandaşları, qırımtatar faalleri Enver Ömerov, Riza Ömerov ve Ayder Cepparovğa qarşı mahkeme oturışuvı

Ukraina Prezidentiniñ Qırım MC-deki Temsilciligi bügün, 2021 senesi qara qış ayınıñ 11-de, saat 14:00-de, Rusiyeniñ Rostov-na-Donu şeerindeki Cenübiy bölük arbiy mahkemesinde siyasiy sebeplerden taqip etilgen Ukraina vatandaşları, qırımtatar faalleri Enver Ömerov, Riza Ömerov ve Ayder Cepparovğa qarşı soñki mahkeme oturışuvı keçirilecegini haber ete. Siyasiy mabuslar soñki sözlerinen çıqışlarda bulunacaq.

”Enver Ömerov, Riza Ömerov ve Ayder Cepparovğa qarşı mahkeme ceryanı siyasiy sebeplerge esaslana ve Rusiye Federatsiyanıñ işğalci akimiyeti tarafından yerli qırımatar halqınıñ vekilleri üzerine muntazam şekilde yapılğan basqınıñ devamıdır. Qabaatlavğa köre, Ukraina vatandaşları vaqtınca işğal etilgen Qırım yarımadasınıñ topraqlarında esassız şekilde ”terrorist faaliyetinen oğraşuvda” qabaatlana, amma qabaatlav olarnıñ öz dinlerini kütkenlerine, ana vatanlarında yaşamağa devam etkenlerine, qırımtatar halqınıñ başqa vekillerinen birdemlik numayış etkenlerine ve cezalavlarğa qarşı küreşkenlerine esaslana. Omerovlarnıñ oğlu ve babası misalinde vaqtınca işğal başlanğandan berli ve bu küngece Qırım yarımadasınıñ topraqlarında defalarca grajdan jurnalistler, faaller ve bütün aile olaraq qırımtatarlar taqip etilgenini köremiz. Ukrain uquq qorçalav organları er türlü qanunsız taqip etüv adisesini qayd ete, Ukraina Prezidentiniñ Qırım MC-deki Temsilciligi ise Ukraina çetel işler Nazirligi ile beraber Ukraina akimiyetini ve halqara ortaqlarını Qırımdaki vaziyet aqqında haberdar ete. Böyle faaliyetniñ neticesi olaraq, Qırımda insan aqlarınıñ bozulmasına dair 2020 senesiniñ ilk qış ayında qabul etilgen BM Baş assambleyasınıñ quvetleştirilgen qararnamesi, siyasiy ve diniy sevbeplerden taqip etüvnen razı olmağanını ayrıca qayd ete”– dep izaatlay vaziyetni Ukraina Prezidentiniñ Qırım MC-deki Daimiy Temsilcisiniñ Birinci muavini Darya Svırıdova.

Qırım boyunca ve bütün dünyada faallerge qol tutuv olaraq tedbirler ötkerildi, qırımtatarlarnıñ evlerinde dualar oquldı, siasiy mabuslarnıñ seslerine olarnıñ aqabalarını ve dostlarını çevirgen fleşmoblar keçirildi.

Hatırlatamız ki, 2020 senesi ilk qış ayınıñ 23-de, ”devlet qabaatlavı” Qarasasuvbazardaki «Hizb ut-Tahrir davasınıñ» iştirakçileri Enver Omerov, Riza Omerov ve Ayder Capparov içün büyük ükümler talap etti:

59 yaşlı Enver Ömerov içün – sert rejimli koloniyada qalmasınen 19 yıllıq apis cezası. Onıñ oğlu Riza Ömerov içün – sert rejimli koloniyada qalmasınen 19 yıllıq apis cezası. Ayder Capparov içün sert rejimli koloniyada qalmasınen 18 yıllıq apis cezası.

(1961 senesi doğma) Viktor oğlu Enver Ömerov 2019 senesi ilk yaz ayınıñ 10-da Rostov-na-Donu şeerindeki mahkeme oturışuvına ketken arada yaqalanğan edi. Evli, eki balası bar. Faal ve cemaat erbabı olaraq Qarasuvbazar şeerinde balalar içün kütleviy bayramlar teşkil ete edi. Bundan evel quvetçiler ve akimiyet organları tarafından cezalavlarğa oğrağan vatandaşlarına destek bere edi, çu cümleden, göñülli faaliyetlernen oğraşa, siyasiy mabuslarnıñ qorantalarına qol tuta, siyasiy mabuslarnıñ özlerine erzaq yollamağa yadım ete edi.

(1988 senesi doğma) Riza Ömerov – Enver Ömerovnıñ oğlu. Evinde tintüv keçirilgen soñ babasınen bir künde, yani 2019 senesi ilk yaz ayınıñ 10-da yaqalanğan edi. Riza Ömerovnıñ yüklü ömür arqadaşı tintüv esnasında müddetten evel bala tapmağa başlağanı içün hastahanege alıp ketildi. Riza Ömerov evli, onıñ dört balası bar

(1980 senesi doğma) Enver oğlu Ayder Capparov – Qarasuvbazar rayonındaki Zuya qasabasınıñ sakini. 2019 senesi ilk yaz ayınıñ 10-da evinde keçirilgen tintüvden soñ yaqalanğan edi. Evli, onıñ 8 balası bar. Lübnandaki Al-Cinan Universiteti Arap tili ve edebiyatı fakultetinde oqudı. Yerli caminiñ müezzini edi. Yaqalanmaqtan evel kiçik ve büyük şahsiy şirketlerde energetika saasında tesisatçı olaraq çalıştı.

Mahkeme ceryanını Qırım birdemligi saifesinde taqip etmege mümkün.