Donbas ve Qırım mevzusında Ukrainanıñ haberler saası bügünde-bügün feyk, manipulâtsiya ve tecavuz ile tolu – Prezident

Prezident Volodımır Zelenskiy Donbas ve Qırım meselelerinde ukrain akimiyetiniñ esas vazifeleri, diplomatiyadan ğayrı, haber ve gumanitar siyasetnen bağlı olğanını qayd etti.

”Bu siyasetler bir-birinden ayırılmaylar. Aqıqat KÇNN sıñırlarından tış farqlı olsa, Ukrainada ne qadar yahşı olğanı aqqında laflarnıñ faydası yoq. Olıp keçken bir-de-bir yahşılıqlar aqqında vatandaşlarımıznıñ haberleri olmasa ve, neticede, olar bu yahşılıqlarnen faydalanıp olamasalar, bu yahşılıqlarnıñ da emiyeti yoq,” – Donetsk vilâyetiniñ Mariupol şeerinde keçirilgen ”Birlik forumında” çıqışta bulunır eken, dep qayd etti devletniñ başlığı.

”Tesirli gumanitar siyaset ilk nevbette devletniñ vazifesi olsa, haber siyaseti ise akimiyetniñ, matbuat vastalarnıñ ve içtimaiy ağlarnı qullanıcılarnıñ umumiy çağıruvı ve umumiy mesüliyetidir”,- dep qayd etti o.

Prezidentiñ aytqanına köre, bügünde-bügün büyük matbuat vastalarında Qırım aqqında haberler yoq derecede, bu mevzu matbuat vastalarınıñ kün tertibinden yoq oldı, Ukrainanıñ nezareti altında bulunmağan topraqlardaki insanlar aqqında haberler tek cenk mevzusınen bağlı, böyle al ise bu adamlar aqqında menfiy fikirlerge ketire. ”Sözde LNR ve DNR-ge munasebetlerine baqmadan, Luganskta ve Donetskte yaşağan vatandaşlarımıznı istisnasız ”separ” dep adlandıralar, resmiy beyanatlarda ise olarğa ekseriy allarda ”sakinler” deyler. ”Vaqtınca işğal etilgen topraqlarnıñ sakinleri”. Qırım ile Donbas sakinlerini añğanda, biz olarğa pek siyrek allarda ”Ukraina vatandaşları” deymiz. Bu yañlış davranıştır. Olar aqqında unutmamalımız. Olar da Ukraina vatandaşları olğanlarını unutmamalılar”, – dep qayd etti Volodımır Zelenskiy.

”Bügün, men bellesem, bizim haber saası minalarnen tolu. Feyk ile manipulâtsiyalardan ğayrı, ökünç, tecavuz ve nefret ile tolu sözler rast kele. Fikirimce, bütün cemiyet olaraq teren nefes alıp ve çıqarıp, sakin qonuşmamız kerek. Tüşünip qonuşmamız kerek. Artqaç duyğusız ve şıarsız qonuşmalımız”, – dep qayd etti Prezident.