Bugün, ekim ayınıñ 6-da, Ukraina Prezidentiniñ Qırım Muhtar Cumhuriyetindeki Temsilciliginde Qırım platforması Ofisiniñ faaliyetini halqara ortaqlarımızğa taqdım etüv tedbirleri çerçivesinde Anton Korınevıç ve onıñ muavinleri Tamila Taşeva ve Darya Svırıdova Mustaqil Malta Ordeniniñ Ukrainadaki Fevqulâde ve Vekâletli Elçisi Antonio Gazzanti Pulyeze di Kotrone, onıñ yardımcısı Sofiya Migal ve mesleatçısı Andriy Hanas ile iş körüşüvini keçirdiler.

Körüşüv çerçivesinde Daimiy Temsilci Anton Korınevıç Qırım Platforması Ofisiniñ faaliyetini taqdim etip, onıñ Ukraina Prezidentiniñ Qırım Muhtar Cumhuriyetindeki Temsilciliginiñ terkibinde ayrı bir bölük olaraq çalışıp, Ukraina devlet akimiyet organlarını, ecnebiy devletlerni, halqara teşkilâtlarnı ve Qırımda yaşağan Ukraina vatandaşlarını birleştirüv ve aralarında bağ tutuv içün daimiy sürette hızmet etecek bir meydançıq olacağını bildirdi. 

Bundan ğayrı Anton Korınevıç, Qırım Platforması Ofisi Kıyiv şeerinde «Qırım habı» vazifesini becerip, avuştırılğan çeşit türlü Qırım akimiyet organlarınıñ, Ekspertler ağı azalarınıñ ğayretlerini birleştirüv, beraberlikte vatandaşlarnı qabul etüv, yerli ve halqara ekspertlerniñ iştiragi ile Qırımnı işğalden azat etüv ve ğayrıdan integratsiya etüvge bağışlanğan tedbirlerni keçirüv içün hızmet etecegini musafirlerge haber etti.