Helsinki komitetinde (AQŞ, Vaşıngton) ”İşğal altındaki yaşayış: Qırımda insan aqları saasında vaziyet” mevzusında diñlevler

2020 senesi qara qış (yanvar) ayı 28 künü Helsinki komitetinde (AQŞ, Vaşıngton) ”İşğal altındaki yaşayış: Qırımda insan aqları saasında vaziyet” mevzusında diñlevler olıp keçti. Öz çıqışı devamında Ukraina Prezidentiniñ Qırım MC-deki Daimiy Temsilcisiniñ muavini Tamila Taşeva Rusiye işğaline qarşılıq köstergen qırımtatarlar ve ukrainler işğalci akimiyet tarafından taqip etilgenini, azatlıqtan marum etilgenini, öldürilgenini ve qıynalğanını, Rusiye Federatsiyası öz vatandaşlığını vaqtınca işğal etilgen Qırımnıñ sakinlerine zorbalıqnen qabul ettirgenini, işğalci devlet oña qol tutmağan yerli ealini öz vatandaşlarına deñiştirgenini, qanunsız alda qırımlılarnı öz ordusında hızmet ettirgenini, balalarnı ve gençlerni arbiyleştirgenini qayd etti.

Bundan ğayrı, Tamila Taşeva vaqtınca işğal etilgen Qırım Muhtar Cumhuriyeti ve Aqyar şeeri boyunca devlet siyasetindeki deñişmeler, vaqtınca işğal etilgen topraqlarda yaşağan Ukraina vatandaşları ile munasebetlerniñ saqlanması, ğayrıdan tiklemesi ve pekitilmesi içün şaraitler yaratqan teşebbüsler ve muayyen areketler aqqında ikâye etti.

Çıqışına yekün çeker eken, Daimiy Temsilcisiniñ muavini Amerika Qoşma Ştatlarına Ukrainanıñ topraq bütünligine daimiy şekilde qol tutqanı, Rusiye Federatsiyasınıñ silâlı tecavüzine qarşılıq kösterüvde yardım etkeni, insan aqları bozulğan şahıslarğa yardım etken ve Qırımdaki vaziyetni nezaret etken leyhalarğa ve şu cümleden cemaat teşkilâtlarına qol tutqanı içün öz minnetdarlığını bildirdi. Tamila Taşeva Amerika Qoşma Ştatları vaqtınca işğal etilgen Qırım Muhtar Cumhuriyetini ve Aqyar şeerini Ukrainanıñ umumiy nezareti altına qaytarmaq maqsadınen halqara muzakereler platformasını teşkil etüvnen bağlı ukrain teşebbüsine qol tutacağına ümütini bildirdi.