Qırımnı suv ile temin etüvge dair Rusiye Federatsiyasınıñ devlet organları ve işğalci akimiyetniñ vekilleri tarafından yapılğan beyanatlar aqqında

İnsan aqlarını qorçalav saasındaki halqara añlaşmalardan Rusiye tarafı delil olaraq ketirilgen maddeler suv aqqı, suv ile temin etüv ya da başqa malzemelernen teminlev mecburiyetlerine ait degil, başqa insan aqlarınıñ kefil etilmesi ve temin etilmesi ile bağlıdır. Vaqtınca işğal etilgen yarımadanı semereli nezareti altına alğan soñ, onlarca ukrain ve qırımtatar faalcilerini öldürgen, zorbalıqnen qaçırğan ve qıynağan işğalci devlet tarafından yaşav aqqınıñ bozuluvı ve qıynavlar aqqında aytılğanı asla aqılğa sığmağan şeydir.

İşğalci devlet sıfatındaki Rusiye Federatsiyası ve işğalci akimiyetni temsil etken şahıslar 2014 senesi kiçik ayınıñ 20-den başlap, vaqtınca işğal etilgen Qırım Muhtar Cumhuriyetinde ve Aqyar şeerinde yüz bergen öldürüvler, zorbalıqnen ğayıp oluvlar ve qıynavlar içün mesüliyetlidir.

Halqara gumanitar uquqqa binaen, işğalci devlet semereli nezareti altında bulunğan vaqtınca işğal etilgen topraqlarda meydanğa kelgen er şey içün mesüliyetlidir. 1949 senesi arman ayınıñ 12-de qabul etilgen Cenk vaqıtında grajdan ealini qorçalav aqqında Şartnamesiniñ (Dörtünci Jeneva konventsiyası) 55-ci maddesindeki birinci qısmında, işğal etilgen toraqlarnıñ resursları yeterli olmasa, işğalcı akimiyet ealini bütün aşayt malları ile tibbiy malzemelernen temin etilmesini, şu cümleden, aşayt mallarınıñ, tibbiy malzemelerniñ ve başqa mallarnıñ ketirilmesini evelden nazarğa almalı. Suv kibi resurs da aynı vaziyettedir. Yani, işğal altındaki ealini kerekli resurslarnen işğalci devlet temin etmelidir.

Bundan ğayrı, Dörtünci Jeneva konventsiyasınıñ 60 maddesine binaen, üçünci taraf bergen gumanitar yardım bile işğalci devletni Dörtünci Jeneva konventsiyasınıñ 55 maddesi ile işğalcige yüklengen mesüliyetten azat etmey. Onıñ içün, Dörtünci Jeneva konventsiyasınıñ mündericesine binaen, işğal altındaki ealini kerekli aşayt mallarınen, tibbiy malzemelernen ve başqa resurlslarnen işğalci devlet temin etmelidir.

Vaqtınca işğal etilgen Qırım Muhtar Cumhuriyetini ve Aqyarnı şeerini suvnen temin etmek işğalci devlet sıfatındaki Rusiye içün palığa çıqa. Bu sebepten o, doğrudan ya da halqara ortaqlarğa yapılğan basqısı vastasınen Ukrainadan vaqtınca işğal etilgen topraqlarğa suv teminatını ğayrıdan tikleycek ola. Ancaq Ukraina, topraqlarını 6 yıl devamında işğal etken işğalciniñ ögünde turğan problemlerni çezmemelidir.