Rusiye Federatsiyası vaqtınca işğal etilgen Qırım yarımadası topraqlarında cinayetlerini işlemege devam ete Medeniy mirasnı ve yerli cemiyetlerniñ kimligini yoq etüv, Ukrainağa ait mülkiyetiniñ statusını deñiştirüv, onı istimlâq etüv ya da yoq etüv cenk cinayetleri olaraq tanıla bile.

Açıq menbalardan Temsilcilik vaqtınca işğal etilgen Qırım MC topraqlarında ”Villa Mriya” adında yerli mimariy abide qanunsız şekilde istimlâq etilgeninden haberdar oldı https://cutt.ly/5jdkAzR .

Bundan ğayrı, Rusiye Federatsiyasınıñ tedarik saasındaki yekâne malümat tertibatınıñ resmiy Internet saifesindeki ”Villa Kseniya” mimariy abidesini qanunsız tamir etüv ve restavratsiya işleri içün № 0175200000418000670 sanlı sımarış işbu abideniñ bozuluvına ve atta yoq etilüvine ketire bile https://cutt.ly/8jcgjfR .

Ukraina Prezidentiniñ Qırım MC-deki Temsilciligi vaqtınca işğal etilgen Qırım MC ve Aqyar şeeri topraqlarındaki Ukrainağa ait medeniy miras yadikârlıqlarnıñ al-evalını daimiy şekilde nezaret etmektedir.

Bundan ğayrı, Temsilcilik Ukraina ile bütün dünyanıñ tarihiy ve atiqiy mırası sayılğan (ve UNESCO cedveline kirsetilgen) eski Hersones-Tavriya şeeriniñ ve civarlarınıñ Rusiye Federatsiyası tarafından qanunsız şekilde işletilgenine halqara cemiyetniñ diqqatını celp ete. Al-azırda eski Hersones-Tavriya topraqlarınıñ Rusiye Federatsiyasınıñ işğalci akimiyeti tarafından qanunsız şekilde işletilüvi meselesi daa ziyade kerginleşti. Misal olaraq, Rusiye vatandaşları tarafından yapılğan qanunsız atiqiy qazmalar ve Hersones topraqlarını ”eyileştirmek” maqsadınen işğaci akimiyet tarafından kerçekleştirilgen qanunsız areketler dünyanıñ medeniy mirası sayılğan abideniñ kerçek sıfatını bozmaqta.

Yuqarıda qayd etilgen malümatlar Temsilcilik tarafından talil etilip, Qırım Muhtar Cumhuriyeti ve Aqyar şeeri Prokuraturasına yollanıldı. Teşkerüv neticesinde yuqarıda añılğan malümatlar medeniy miras yadikârlıqlarına qarşı işlengen cenk cinayetleri, yani qanunsız şekilde atiqiy qazuvlarnı keçirüv, tarihiy ve medeniy abidelerni yoq etüv ya da bozuvğa dair cinaiy davalağa qoşuldı.

Qoşma malümat:
”Villa Mriya”: (V.A.Çuykeviç); 1913 senesi quruldı; bulunğan yeri: Ukraina, Qırım Muhtar Cumhuriyeti, Yalta şeeri (Simeyiz qasaba şurası), Sovetska soqağı, 64-A; Ukraina medeniyet Nazirligi tarafından 22.11.2012 alınğan 1364 qararnamege binaen Ukrainanıñ taşınmaz abidelerine dair Devlet cedveline kirsetildi; qorçalav nomeri 4817-АР.
”Villa Kseniya”: 1916 senesi quruldı; bulunğan yeri: Ukraina, Qırım Muhtar Cumhuriyeti, Yalta şeeri (Simeyiz qasaba şurası), Sovetska soqağı, 64, Б, В, Г, Д arifleri; Ukraina medeniyet Nazirligi tarafından 22.11.2012 alınğan 1364 qararnamege binaen Ukrainanıñ taşınmaz abidelerine dair Devlet cedveline kirsetildi; qorçalav nomeri 4818-АР.

Ukraina medeniyet ve haber siyaseti Nazirligi