Ukrainadaki AHİT MNM Herson gruppasınıñ nezaret eticileri ile iş körüşüvi

2019 senesi aprel 10 künü Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini İzet Gdanov iş körüşüvi şekilinde Ukrainadaki AHİT MNM Herson gruppasınıñ köz eticileri ile körüşti.

Körüşüv esnasında Rusiye tarafından vaqtınca işğal etilgen Qırımda işğalci akimiyetniñ qanunsız areketleri ve vaqtınca işğal etilgen topraqlarda yaşağan Ukraina vatandaşlarını kütleviy şekilde taqip etüv, olarğa qarşı basqı ve qorqutuv areketlerini quvetleştirüv kibi meseleler mahsus nezaret eticilernen muzakere etildi.

Ukraina Prezidenti saylavlarınıñ birinci turı arfesinde qırımtatarlarğa qarşı misili olmağan kütleviy cezalavlarğa ayrıca diqqat etildi.

Bundan da ğayrı, “Qırım Titanı” halq ögündeki aktsioner cemiyetiniñ, ”Qırım soda zavodı” ve ”Brom” halq ögündeki aktsioner cemiyetleriniñ faaliyetleri neticesinde vaqtınca işğal etilgen Qırımda yüz bergen ekologik vaziyet ve içinde zararlı atıqlar saqlanğan Çurbaş deposınıñ topraqlarında kütleviy şekilde qumnı istisal etüv meseleleri de muzakere etildi. İşğalci akimiyetniñ ekologik şartlarğa riayet etip olamağanı ciddiy raatsızlıq doğura ve em vaqtınca işğal etilgen yarımadada yaşağan adamlarnıñ, em de qomşu Herson vilâyeti sakinleriniñ sağlıqlarına menfiy tesir etmekte.

İzet Gdanov, Temsilcilik daimiy şekilde bu meselelerni nezaret etkenini ve vaqtınca işğal etilgen Qırım MC halqara közetüvniñ ve işğalci devletke iqtisadiy basqı artmasınıñ müimligini qayd etti.

”Umumiy areketlernen biz, işğalci er adımı içün tolu derecede mesüliyetle çekilecegi kününi yaqınlaştırmaqtamız”, – dep ayttı Gdanov.

Körüşüvniñ neticesinde taraflar neticeli munasebetlerini devam ettirmege añlaştılar ve kelecekteki işbirlik şekilini belgilediler.