Volodımır Zelenskiy Ukraina Prezidentiniñ Qırım MC-deki yañı Daimiy Temsilcisi Anton Korınevıçnı taqdim etti

2019 senesi oraq (iyül) ayı 14 künü Herson vilâyetine iş ziyareti esnasında Volodımır Zelenskiy ”Çonğar” KÇNN-da bulunğan arada Ukraina Prezidentiniñ Qırım MC-deki yañı Daimiy Temsilcisi Anton Korınevıçnı taqdim etti.

Anton Korınevıç böyle mesüliyetli vazifege tayın etilgeni içün minnetdarlığını bildirip, Qırım Ukrainanıñ ayırılmaz parçası olğanını qayd etti. Qırımlılar ise – Ukraina vatandaşlarıdır.

”Qırım meselesi kün tertibini terk etmemesi, vaqtınca işğal etilgen Qırımda yaşağan Ukraina vatandaşlarınıñ ve Qırımdan memleket içinde köçken şahıslarnıñ aq-uquqlarını qorçalanması içün qolumızdan kelgenini yapacaqmız. İnsanlar ve olarnıñ aq-uquqlarını qorçalav bizim eñ esas vazifemizdir”, – dep qayd etti Daimiy Temsilci.

Anton Korınevıç Temsilcilik işğal etilgen topraqnıñ azat etilüvi ve ğayrıdan integratsiyası boyunca strategiya üzerinde çalışacağını, ameldeki qanuniyette mevcüt olıp, qırımlılarnıñ aq-uquqlarını sıñırlağan maddeleriniñ deñiştirilüvi ile oğraşacağını ve, elbette, Qırımnıñ tamır halqı olğan qırımtatarlarnı qorçalaycağını bildirdi.

”Bütün devlet akimiyeti organlarınen, cemaat teşkilâtlarınen işbirlikke maksimal şekilde açıq olıp, işğal etilgen topraqlarda yüz bergen cinayetlerge qarşılıq kösterecekmiz. Ve qıta Ukrainada yaşağan qırımlılarnıñ ayatlarını qolaylaştırmaq içün qolumızdan kelgenini de yapacaqmız.  Ukraina vatandaşları, qırımlılar öz devletinde raat yaşay bilmeliler”, – dep qoştı Anton Oleksandrovıç.

”Tışqı siyaset meseleleri, içki siyaset meseleleri ve halqara-uquqiy küreşimiz kibi üçlik çerçivesinde çalışacaqmız”, – dep yekünledi Ukraina Prezidentiniñ Qırım MC-deki Daimiy Temsilcisi.