Temsilcilik reberiyetiniñ qırımtatar halqınıñ liderleri ile iş körüşüvi

2020 senesi qara qış (yanvar) ayı 09 künü Ukraina Prezidentiniñ Qırım MC-deki Temsilciliginiñ teşebbüsi ile Temsilcilikniñ reberiyeti qırımtatar halqınıñ liderleri, Meclis azaları, Qurultay delegatları ve cemaat teşkilâtlarınıñ vekilleri ile iş körüşüvini keçirdi.

Körüşüvde Temsilcilik 2019 senesi devamında alıp barğan faaliyetniñ neticeleri, 2020 senesi içün ilk nevbetteki yönelişleri, Temsilcilikniñ Qırımtatar Milliy Meclisi ile stategik bağ tutuv ve işbirlik meseleleri muzakere etildi.

Ukraina Prezidentiniñ Qırım MC-deki Daimiy Temsilcisi Anton Korınevıç memleket içinde köçken ya da vaqtınca işğal etilgen Qırımda yaşamağa devam etken vatandaşlarnı sıñırlaştırğan qanunlarnı deñiştirüvnen bağlı faaliyet, Ukrainağa qarşı silâlı tecavüz neticesinde azatlıqtan marum etilgen şahıslarnı içtimaiy ve uquqiy ceetten qorçalav boyunca qanun leyhası, keçici devirdeki adliye kontseptsiyası üstünde çalışuv devam etkenini qayd etti.

Körüşüv esnasında taraflar Ukraina tamır halqlarınıñ statusını qanuniy seviyede belgilev meselesi, qırımtatar halqını qorçalav, onıñ aq-uquqlarını ğayrıdan tiklev ve Ukraina sıñırlarında öz-özüni belgilev aqqınen faydalanuv meseleleri üstünde beraber çalışmağa añlaştılar.

Kelecekteki işbirlik yönelişleriniñ biri olaraq devlet seviyesinde Qırım ile bağlı olğan haber, tasil ve medeniy leyhalarğa qol tutuvnı belgilediler.

Vaqtınca işğal etilgen Qırımda ve Rusiye Federatsiyasında bulunğan ukrain siyasiy mabuslarını azat etüv ve olarnıñ qorantalarına yardım etüv meseleleri ayrıca muzakere etildi.

Körüşüvde qırımtatar halqınıñ lideri, Ukraina halq deputatı Mustafa Cemilev, Qırımtatar Milliy Meclisiniñ reisi Refat Çubarov ve onıñ muavinlerinden Ukraina halq deputatı Ahtem Çiygoz ile İlmi Umerov iştirak ettiler.