Avropa Parlamentiniñ Azaq boyunca beyanatı

2018 senesi ekim (oktâbr) ayı 25 künü Strasburg şeerinde keçirilgen plenar oturışında Avropa Parlamenti Azaq deñizindeki vaziyet boyunca rezölütsiyanı qabul etti. Vesiqada Azaq deñizinde havfsızlıq ceetten fevqulâde istiqrarsız vaziyet ve Rusiye tarafından Azaq deñizini ve Qaradeñiz regionını arbiyleştirüvniñ devam etmesi, bu cümleden, yañı Ava mudafaası sistemalarnıñ yerleştirilüvi, arbiy ve devriye katerlerniñ Hazar deñizinden köçürilüvi ile ciddiy raatsızlıq bildirile.

Rezölütsiyada Azaq deñizi Rusiyeniñ Ukrainağa qarşı cenkâver areketleri içün yañı deñiz meydanına çevirilgeni sebebinden yazıqsınuv bildirile. Avropa Parlamentiniñ deputatları, RF muntazam sürette Keriç boğazından ukrain limanlarına yaldağan gemilerni qanunsız alda toqtatıp teşkergenini ve böyleliknen mal dönümini tüşürgenini, neticede em Ukrainağa, em de gemilerniñ saiplerine büyük ziyan ketirgenini qayd eteler.

Rezölütsiyada Keriç boğazında Rusiye tarafından Ukrainanıñ topraq bütünligini ve mustaqilligini bozğan köpürniñ qurulması takbih etilip, işbu qurucılıq Azaq deñizindeki ukrain limanlarına irişimni 25%-dan ziyade sıñırlağanı qayd etile. AB Ukrainanıñ mustaqilligine ve topraq bütünligine qol tutqanını bir kere daa qayd etti, Qırım yarımadasınıñ Ukrainağa aitligini ve Ukrainanıñ Azaq deñiziniñ qısımına olğan aqlarını tasdıqladı.

Avropa Parlamentiniñ rezölütsiyası deñiz uquqı boyunca BMT deñiz mahkemesinde ukrain menfaatlarnı qorçalavda qoşma delil olaraq hızmet eter.