Qırımda yaşağan ukrain deñizcileriniñ aququqları qorçalavına bağışlanğan keñeş

Haberler

Oktyabr 17 künü 2017 senesi zenaat birlikleriniñ müracaatlarına binaen Ukraina Prezidentiniñ Qırım Muhtar Cumhuriyetindeki Daimiy Temsilciligi, Qırımda yaşap bütün dünya iş bazarında ticariy gemicilik saasında iş qıdırğan ukrain deñizcilerniñ aq-uquqları qorçalavına bağışlanğan keñeş keçirdi. Keñeşte, naqliyat havfsızlığı boyunca Ukraina Devlet teftiş idaresiniñ, Ukraina deñiz limanları idaresiniñ, deñizci diplomlarınıñ teftişi boyunca İdareniñ, Ukraina içtimaiy siyaset nazirligi yanında Cemaat şurasınıñ, Deñizcilik zenaatları birlikleriniñ, Herson vilâyetiniñ devlet memuriyetiniñ, Ukraina Havfsızlıq Hızmetiniñ Qırım Muhtar Cumhurıyeti ve Aqyar boyunca Baş idaresiniñ, Milliy polisniñ Qırım Muhtar Cumhurıyeti ve Aqyar boyunca Baş idaresiniñ ihtisaslı vekilleri ve Avropa Havfsızlıq ve İşbirlik Teşkilatınıñ közeticileri iştirak etti.

Toplaşuvnıñ iştirakçileri deñizcilik saasında çalışuv boyunca Konventsiyasında ve Limanlarnıñ devlet tarafından nezareti boyunca Parij memorandumında Ukrainanıñ iştirak etmegeni, ukrain deñizcilerniñ reqabetine tesir etkenini muzakere ettiler. Bundan da ğayrı, deñizci şeadetnamesini almaq içün deñizcilerniñ elektron şekilde qaydqa alınuvları ve İdareden deñizcilerge vesiqalarını deral imtiandan soñ berilmesiniñ imkâniyeti muzakere ettildi. Ayrıca, Rusiye akimiyetiniñ ve Halqara naqliyat Federatsiyasına boysunğan Rusiye deñizci zenaat birlikleriniñ ziyankârlığı ve ukrain deñizcilerniñ millet ve vatandaşlıq ayrımcılığına maruz qalğanları qayd etildi.

Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin Qırımda yaşağan deñizciler işke yerleşkende, işğal etilgen topraqlarğa dair qanunlarğa riayet etmeleri şart olğanına toplaşuvda bulunğanlarnıñ ayrıca diqqatlarını çekti. Körüşüv iştirakçileri, Qırımda yaşağan ve deñizcilik saasında çalışmağa istegen vatandaşlarnıñ Ukraina devletinden acele sürette keyfiyetli memuriy, tasil, içtimaiy hızmetlerge ihtiyacları olğanını qayd ettiler.