Qırımnıñ tabiiy saalarında işğal devamında neler deñişti

Tünevin, oraq ayınıñ 22-de, zenaatdaşımız, Qırım Muhtar Cumhuriyetini işğalden azat etüv ve ğayrıdan integratsiya etüv meseleleri boyunca hızmetniñ baş mesleatçısı Vladıslav Miroşniçenko vaqtınca işğal etilgen Qırım Muhtar Cumhuriyeti ve Aqyar şeeri topraqlarında Ukraina tabiat-qoruq fonduna ait olğan obyektlerniñ vaziyetine bağışlap yazğan ”Qırımnıñ tabiiy saalarında işğal devamında neler deñişti” mevzusında maqale neşir etildi.

”Eñ qıymetli tabiiy topraqlar, unikal ösümliklerni ve ayvanat dünyasını qorçalamaq maqsadınen teşkil etilgen qoruqlardır. Olarnıñ işğal şaraitlerindeki vaziyetlerini numayış etmek içün eki misal ketirmemiz yeterlidir:

Qırım tabiat qoruğı yoq etildi, o, eki qısımğa bölündi, olarnıñ eñ büyügi milliy parkka çevirildi.

Opuk qoruğı topraqlarında muntazam sürette arbiy talimatlar keçirile, bombalar atıla, raketalar uçurıla. Qoruq yanındaki deñiz suvları arbiy qalımtılarını toplağan ”mezarlıqqa” çoqtan çevirildi. Böyle taqdir Qırımdaki diger 14 suv-qoruq kompleksni beklemektedir. Misal olaraq, ”Çauda” suv-qoruq kompleksi aynı adnı taşığan ve işğal devamında Rusiye arbiylerini azırlağan esas bazağa çevirilgen poligon ile qomşudır.
Umumdevlet status nafile yerde berilmey. Bu status ile beraber ayrı memuriyetler ve topraqnıñ toqunmamazlığına dair keniş kefaletler berile. Amma Qırımda işğal devamında umumdevlet statusı olğan 48 tabii saadan 40 qanunsız şekilde statusını coydı, böyleliknen saqlanmalarına dair kefaletler eksildi, inkişaf etmeleriniñ lafi bile yoq.” – dep qayd ete maqalesinde Vladıslav.

Qırım tabii saalarını qorçalav saasında vaziyet, muayyen misaller ve Rusiye Federatsiyasına boysunğan işğalci memuriyetlerniñ areketleri aqqında daa tafsilâtlı şekilde aşağıda ketirilgen maqaleniñ tolu metininde oquy bilesiñiz.

İşğalcilerniñ Qırımğa ve Qırım tabiatına kerçek yanaşuvlarını aks ettirip, acayip maqale yazğan zenaatdaşımızğa minnetdarlığımıznı bildiremiz. Yaqın kelecekte yañı meraqlı tedqiqatlarınen tanış olacağımızğa ümüt etemiz.

Maqale bu yerdedir:

https://investigator.org.ua/ua/investigations/235706/