“Qırımdaki narazlıq areketi qadın yüzlüdir”, – Tamila Taşeva

2019 senesi ilk qış (dekabr) ayı 10 künü Üçünci Ukrain Qadın Kongresi öz işini başladı. Kongresniñ ekinci paneli aq qorçalav saasında qadın imkânlarınıñ muzakere etilüvine bağışlandı.

Tamila Taşeva qadın areketi ilk nevbette birdemlikni ifade etkenini qayd etti. Qırımda simdiki narazlıq areketi qadın yüzlüdir. Siyasiy mabuslarnıñ anaları, refiqaları, qız qardaşları, tataları ve qızları, erkeksiz qalıp, em qorantalarını baqalar, em de erkekleriniñ azat etilmesi içün küreşniñ ağır yüküni öz boyunlarına alalar.

Ukraina Prezidentiniñ Qırım MC Daimiy Temsilcisiniñ muavini bügün Qırımda siyasiy mabuslarnı qorçalağan aq qorçalayıcılardan Lilya Gemici ile Emine Avamilevanı, grajdanlıq jurnalistlerden Lütfiye Zudiyevanı, Mumine Saliyevanı ve Gulsum Aliyevanı, qırımtatar ve ukrain narazlıq ruhunıñ azalarından Ayşe Seyitmuratovanı, Olga Pavlenkonı, Lilya Bucurovanı, Larısa Kıtayskanı, Lenora Dülberni, rahmetli Veciye Kaşkanı ve öldürilgen Katya Gandzükni añdı.

”Siyasiy mabuslarnıñ miqdarı, qırımtatarlada ve ukrainlerde keçirilgen tintüvler aqqında malümatlarnıñ arqasında bir çoq qadın turmaqta, biz olarnen birdemligimizni numayış etmelimiz. Çünkü küreşçiler safına qoşulğan bu qadınlarnıñ aq-uquqları da em Donbasta, em Qırımda bozula”, – dep qayd etti Tamila Taşeva.

Tamila hanımnıñ fikirince, qadınlar duyğulı olğanları, ev qoruyıcısı vazifesini becergenleri içün aq qorçalav saasında da ekseriyetni teşkil eteler. Asılında uzun vaqıt devam etken stres vaziyetlerge, cenk, Qırım işğali kibi bügünki çaqıruvlarğa qadınlar ziyade dayanıp olalar. Qırımda ve Donbasta yüz bergen cinayetlerni diñlemek ve yazıp almaq içün büyük irade kerek. Erkekler tez areket etüvni talap etken vaziyetlerde daa atik olğanda, qadınlar uzun sürgen vaziyetlede vazifelerni daa muvafaqiyetli becereler.

”Zemaneviy Ukrainadaki aq qorçalav faaliyeti – daimiy streste yaşayıştır ve bu işni ekseriy allarda qadın aq qorçalayıcıları öz boyunlarına alalar. Ukrainadaki aq qorçalav teşkilâtlarnıñ reisleri ekseriy allarda qadınlardır. Olar er kün birdemliklerini numayış eteler. Bü kibi tedbirlerge vaqtınca işğal etilgen topraqlarda yaşağan qadın aq qorçalayıcılarnı davet etmege teklif etem. Çünki bu qadınlar itibarğa lâyıqlar”,- dep yekün çekti Tamila Taşeva.