Ukraina tamır halqları ve olarnıñ aqlarını qorçalav aqqında bügün Hersonda Halqara tamır halqlar kününe bağışlanğan tögerek masada qonuştılar

Tedbir Ukraina Prezidentiniñ Qırım MC Temsilciliginiñ ve Herson vilâyeti devlet memuriyetiniñ teşebbüsi ile keçirildi, tögerek masada vilâyet reberiyeti, devlet akimiyeti organlarınıñ, temel halqlarnıñ, milliy azınlıqlarnıñ ve cemaat teşkilâtlarınıñ vekilleri iştirak etti.

Toplaşuvnı açar eken, Herson VDM başlığı Yuriy Gusev, ”Bizler, çeşit türlü milletlerge mensüp olğan ukrainalılar içün bu kün pek müimdir, çünki biz epimiz bir horantamız. Ukrainanıñ bir qısımı işğal etilgen arada, devletimizniñ quvetleşmesi içün özara dialog qurmamız, fikir paylaşmamız ğayet muimdir” sözlerinen tedbirniñ aktualligini qayd etti.

Al-azırda Ukraina qanuniyetinde tamır halqlar aqqında qanun yoq. Bu meseleniñ qanuniyet seviyesinde pekitilmesi muim olğanını Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç qayd etti: ”Cümlemiz Qırımnıñ Ukraina nezareti altına qaytarılması içün çalışamız. Tamır halqlarnı qorçalav meselesi Herson vilâyeti içün ğayet muimdir”.

Tögerek masa iştirakçileri Ukraina tamır halqları aqqında qanunı qabul etmek, tamır halqlarnıñ aq-uquqlarına riayet etmek, Qırım yarımadasınıñ vaqtınca işğali şaraitlerinde Herson vilâyetinde tamır halqlarınıñ ve milliy azınlıqlarnıñ vekillerine ziyade qol tutmaq kerek olğanını qayd ettiler.

Tedbirniñ soñunda toplaşuvda bulunğanlar Kremlniñ siyasiy mabuslarına qol tutuv olaraq fleşmob keçirdiler.