Prezident maküm etilgen ukrainalar ne vaqıt azat etilecegi aqqında eñ yaqın kelecekte belli olacağına ümüt ete

Ukraina Prezidenti Volodımır Zelenskıy al-azırda vaqtınca işğal etilgen topraqlarda ve Rusiye Federatsiyasında qanunsız alda tutulğan Ukraina vatandaşlarını qaytaruv boyunca iş alıp barılğanını qayd etti ve makumlarnıñ birinci qısımı ne vaqıt azat etilecegi aqqında eñ yaqın kelecekte belli olacağına ümütini bildirdi.

”Ukraina vatandaşlarını evlerine qaytaruv – bizim ilk nevbetteki büyük vazifelerimizden biridir”, – Ukraina ile Türkiye arasındaki yüksek seviyede Strategik şurasınıñ 8-nci toplaşuvınıñ neticeleri boyunca matbuat vastalarınen subetleşken arada dep bildirdi Prezident.

Volodımır Zelenskıynıñ aytqanına köre, faaliyet eki yöneliş boyunca yürsetile. Birincisi – Minsk şeerindeki Üçtaraflama kontakt gruppası çerçivesinde vaqtınca işğal etilgen Donbas topraqlarında tutulğan ukrain mabusları boyunca.

”Cedvel azırlanmaqta. Cedvel pek uzundır. Biz endi onı teslim ettik. Bu cedvel Minskte tasdıqlanacaq”, – dep bildirdi Volodımır Zelenskıy.

Prezident makumlarnıñ birinci qısımı ne vaqıt azat etilecegi aqqında eñ yaqın kelecekte belli olacağına ümütini bildirdi.

”Ne içün birinci qısım? Çünki anda kerçekten de pek çoq adam bar”, – dep qoştı o.

Ekinci yöneliş – vaqtınca işğal etilgen Qırımda ya da Rusiye topraqlarında bulunğan ukrainalılarnıñ azat etilüvini Rusiye tarafı ile muzakere etüv. ”Bu iş de başlandı. Eminim ki, eñ yaqın vaqıtta künleri belgilenecek ve cemiyetimiz bu cedvellernen tanış olacaqtır. Biz, bütün taqımımız, bunıñ üzerinde ağır çalışamız, Rusiye tarafınen muzakere etilgen ve RF topraqlarında bulunğan mabuslarnıñ ekseriyetini kerçekten de qırımtatarlar teşkil ete”, – dep bildirdi Devlet başlığı.

Menba: Ukraina Prezidentiniñ İnternette resmiy temsilciligi