Ukraina Prezidenti, Boris Babinni Qırımda Daimiy Temsilcisi vazifesine tayinledi

Prezident Petro Poroşenko, Boris Babinniñ Ukraina Prezidentiniñ Qırım Muhtar Cumhuriyetindeki Daimiy Temsilcisi vazifesine, İzet Gdanovnıñ ise, Ukraina Prezidentiniñ Qırımdaki Daimiy Temsilcisiniñ birinci müavini vazifesine tayinleri aqqında emirlerini imzaladı.
Prezident Petro Poroşenko, Boris Babinniñ Ukraina Prezidentiniñ Qırım Muhtar Cumhuriyetindeki Daimiy Temsilcisi vazifesine tayini aqqında emirini imzaladı. Bundan evel imzalanğan emiri esasında bu vazifeden Nataliya Popoviç boşatılğan edi.

Prezident qayd etkenine köre, o, Qırımtatar halqınıñ meseleleri boyunca Ukrayna Prezidentiniñ yardımcısı Mustafa Cemilev ve Qırımtatar Milliy Meclis reisi Refat Çubarov ile körüşüvlerinden soñ, Ukraina Prezidentiniñ Qırım Muhtar Cumhuriyetindeki Daimiy Temsilciliginiñ faaliyetini teşkirmege avale etken edi. ”Yazıqlar olsun ki, cemaat faaleri ve Meclis temsilcileri tarafından maña haber etilgen malümatlar belli bir derecede tasdıqlandı. Bunıñ esasında, kadro deñişmeleri kerek olğanı aqqında qarar alındı’’, – dep ayttı devlet reisi.
Petro Poroşenko, Boris Babinniñ adliye saasında ve bilhassa halqara uquq saasında ihtisaslı ve tecribeli mütehassıs olğanını qayd etti. Prezidentniñ aytqanına köre, o, Ukraina Adliye Nazirliginde çalışqan vaqıtta özüni tek müsbet taraftan kösterdi, hususan insan aq-uquqları boyunca Avropa mahkemesinen işbirligini yürütti ve vaqtınca işğal olunğan topraqlardan köçkenlerniñ meselelerinen oğraştı.

”Bunınen beraber, zanımca, Ukraina Prezidentiniñ Qırım Muhtar Cumhuriyetindeki Daimiy Temsilciliginiñ terkibinde birinci nevbette qırımtatar halqınıñ aq-uquqları qorçalavınen oğraşacaq ayrı mütehassıs olmalı. Bu sebepten, Daimiy Temsilciliginiñ faaliyeti aqqında emirge deñişmeler kirsetip, mezkür vazifeni Daimiy Temsilcisiniñ birinci müavinine avale etemiz” – dep qayd etti Ukraina reisi.

Prezident Petro Poroşenko, İzet Gdanovnıñ Ukraina Prezidentiniñ Qırımdaki Daimiy Temsilcisiniñ birinci müavini vazifesine tayini aqqında emirini imzaladı.
Devlet reisi vade etkenine köre, Ukraina Prezidentiniñ Qırım Muhtar Cumhuriyetindeki Daimiy Temsilcisi yarımadanı işğalden azat etilmesinen oğraşqan iş gruppasına da kirecek.
«Vaqtınca işğal olunğan Qırımda Ukrain akimiyetiniñ ğayrıdan tiklenmesi – bizim birinci nevbetteki vazifemizdir», – dep qayd etti Petro Poroşenko.

Prezidentniñ aytqanına köre, bunınen beraber, Anayasağa kirsetilecek deñişmeler keyfiyetli şekilde azırlanmalı: «İş gruppasınıñ areketlerini faalleştirecekmiz. Anayasağa kirsetilecek deñişmeler leyhasınıñ Yuqarı Şuramızda eñ yaqın vaqıtta taqdim etilmesini isteyim».
Prezident, Qırımnıñ qanunsız işğalinden zarar körgen adamlarnıñ aq-uquqlarınıñ qorçalavını da müim mesele olaraq adlandırdı. «Bu meselede tecribeñizge işanam. Ümüt etem ki, siz birinci künlerden başlap faal ve mesüliyetli areketlerge qoşulırsıñız», – bu şekilde devlet reisi İzet Gdanovğa muracaat etti.

Bundan da ğayrı, Prezident işqal olunğan Qırımda devlet menfaatınıñ uquqiy imayesiniñ müimligini qayd etti. Lafnıñ mevzusı – musadere etilgen devlet mülkiyeti, halqara mahkemelerde uquqiy imaye, mülkiyetlerini coyğan müessiseler, iş adamları ve adiy vatandaşlarnıñ faaliyetlerine reberlik.

«Bu sozulacaq mesele degil. Birinci künlerden başlap, sizden semereli, devletimizniñ faydasına hızmet etecek areketlerni bekleyim», – böyle sözlernen devlet reisi subetini neticeledi.
Qırımtatar Milliy Meclis reisi Refat Çubarov Prezidentke, cemaatnıñ adından devletniñ reisine yapılğan müracaatqa cevap bergeni içün teşekkürini bildirdi. «Eminim ki, devlet teşkilâtlarnıñ arasında Ukraina Prezidentiniñ Qırım Muhtar Cumhuriyetindeki Daimiy Temsilciligi müyim yerni alır ve onıñ faaliyeti Qırımnıñ azat etilüvine, qaytarılmasına hızmet etecek» dep ayttı o.
Meclis reisi, Boris Babinni şahsen tanığanını qayd etti ve onı, Qırımnıñ birçoq meselelerinen oğraşqan meşur adliyeci olaraq adlandırdı.

Refat Çubarov Ukraina Prezidentiniñ Qırım Muhtar Cumhuriyetindeki yañı Daimiy Temsilcisine ve onıñ müavinine muvafaqiyetler tiledi.