Prezident Hmelnitsk vilâyetinde Rusiye esirliginde bulunğan gemiciniñ aqrabaları ile körüşti

Prezident Petro Poroşenko Hmelnitsk vilâyetinde Rusiye esirliginde bulunğan ukrain gemicisi Sergiy Tsıbizovnıñ aqrabaları ile körüşti. Petro Poroşenko Sergiynıñ aqrabalarına qol tutuv sözlerini bildirdi. Sergiy ve başqa ukrain arbiyleri kerçek qaramanlar olğanını qayd etti. Prezident rus arbiyleriniñ tecavüzi esnasında bizim gemicilerimiz halqara uquqnıñ talaplarına riayet etip davranğanlarını ayrıca qayd etti.

Prezident esirlerniñ azat etilüvi içün devlet seviyede yapılğan tedbirler aqqında haber etti. O, ukrain arbiyleri halqara uquqqa binaen cenk esirleri olğanını qayd etti.

Petro Poroşenko Avropa Birliginiñ ve başqa devletlerniñ yolbaşçıları ile telefon vastasınen bir sıra sübetler keçirgenini qayd etti. Bu cümleden, Almaniya Kantsleri Angela Merkel, AQŞ Devlet Kâtibi Mayk Pompeo, Kanada Baş naziri Castin Trüdo ile telefon sübetleri devamında ukrain arbiylerini azat etmek ve gemilerini qaytarmaq kibi Ukrainanıñ talaplarına qol tutuv ğayet muim olğanını ayrıca qayd etti. ”Bizim halqara ortaqlarımız bizge tolusınen qol tuta”, – dep bildirdi o.

Devletimizniñ Başlığı bu mesele daima onıñ nezareti altında bulunğanını qayd etti. Bu cümleden, bütün cenk esirlerine mütenasip uquqiy yardım berilecek. Devletimizniñ Başlığı keçenlerde bunı çetel işler Nazirligine avale etti.

Bundan da ğayrı, Prezident Hmelnitsk vilâyeti devlet memuriyetiniñ yolbaşçısına Sergiy Tsıbizovnıñ qorantası ile daimiy alâqada bulunmağa ve olarğa kerekli yardımnı bermege avale etti.