”Q-hub” Qırım tasil-leyha platforması tarafından teşkil etilgen ”UniTour” leyhasını taqdim etüv

Oraq ayınıñ 6-da Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç ”Q-hub” Qırım tasil-leyha platforması tarafından teşkil etilip, ”UniTour” adlı birinci ukrain studentler seyahat şousını numayş etken ”UniTour” leyhasını taqdim etüvde iştirak etti. 13 seriyadan ibaret olğan seyahat şousı vaqtınca işğal etilgen topraqlarda yaşap, yaqın kelecekte student olacaq gençlerge 5 ukrain şeerinde bulunğan 13 aliy oquv yurtı aqqında ikâye ete. Taqdim etüv çerçivesinde 1-nci seriya ilk kere numayış etildi.

Birinci seriyada memuriy sıñırnı keçüvnen bağlı hususiyetler, vesiqalarnı resmiyleştirüv ve Herson deñiz akademiyasında tasil aluv aqqında ikâye etile.
Cemi olaraq 13 seriyanıñ kösterilmesi planlaştırıla, er biri 5 farqlı şeerde bulunğan universitetlerni taqdim etip, mahsus devlet programmaları vastasınen oquvğa qabul etüv ceryanını tafsilâtlı şekilde añlatacaqtır. Seyahat şousı müellifleriniñ aytqanlarına köre, olar eñ güzel aliy oquv yurtlarını seçtiler.

Er bir yayın qararnen 20 daqqa devam ete. Bu vaqıt içinde onıñ alıp barıcısı tek universitet aqqında degil de, bir-de-bir gençler teşebbüslerini ya da abituriyentlerni raatsızlağan meselelerni tarif ete.

Seyahat şousınıñ alıp barıcısı – 17 yaşındaki Girey Lümanov Ukraina aliy oquv yurtuna kirişniñ bütün basamaqlarını seyircilerge köstere.

”Bu leyha – kerçek yolnıñ bir qısmıdır, yani, bu seyahatnı yapqan arada men ale daa zenaat saylayım. Biz Herson ile Odesada bulundıq. Men bu meseleni ogrenmektem, onıñ içün bu, vesiqalı ikâyedir”, – dep añlata Girey.

Leyhanıñ müellifleri esas diqqatnı zenaat seçimine ayıralar. Seriyalar universitetke kiriş aqqında ameliy malümatnı bermeknen yetinmeyip, zenaatlarnıñ hususiyetlerini de tarif eteler.

”Müimden müim maqsadımız – böyle yapmaq kerekmiz ki, olar zemaneviy Ukrainanı, onıñ çeşit türlü taraflarını körip, oqumağa aves etsinler. Akademiyadan soñ esas qaramanımız uzun seferler yapqan kerçek kapitannı ziyaret ete, gemide onınen sübetleşe, aylıqları ne qadar olğanını soray”, – dep ikâye ete seyahat şousınıñ stsenariycisi Muslim Umerov.

Temsilcilk Ukraina tarafından qırımlılar içün yaratılğan imkânlarnı tanıtqan müim leyhalarnıñ bütün iştirakçilerine minnetdarlığını bildire. YouTube kanalında bu teşebbüsni seyir etip, oña qol tutmağa çağıramız, vaqtınca işğal etilgen topraqlarda yaşağan gençlerni ise müelliflerniñ tevsiyelerini diñlemege davet etemiz.