Temsilicilik BM Baş kâtibiniñ ”Ukrainadaki Qırım Muhtar Cumhuriyeti ve Aqyar şeeri topraqlarında insan aqları saasında vaziyet” mevzusında bugün derc olunğan maruzasını alğışlay. Şunı da qayd etmek kerek ki, maruzanıñ maddeleri Qırım platforması Sammitiniñ iştirakçileri tarafından qabul etilgen Umumiy beyannameniñ maddelerine uyğundır

Maruza açıq-aydın tarzda Rusiye Federatsıyasını işğalci devlet olaraq, onıñ vaqınca işğal etilgen Qırım Muhtar Cumhuriyeti ve Aqyar şeeri topraqlarındaki ”organlarını” ise ”işğalci akimiyet” olaraq adlandıra, bundan ğayrı, çoqtan-çoq qıynav, qanunsız apis etüv, yaqalav, zorbalıqnen ğayıp etüv, din, fikir, tınç toplaşuvlar serbestliklerini bozuv adiselerini tasdıqlay, şu cümleden böyle cinayetler qayd etile:

– Ukraina vatandaşları qanunsız şekilde üküm etile – qanunsız şekilde yaqalanğan Ukraina vatandaşları vaqtınca işğal etilgen yarımadadan Rusiye topraqlarına avuştırıla;
– Rusiye ealisi vaqtınca işğal etilgen Qırımğa köçürilmege devam ete;
– ukrainalılar ile qırımtatar halqınıñ til aqları qaba şekilde bozula;
– Qırım sakinleri Rusiye ordusına çağırıla, çağıruvdan qaçınğan şahıslar ise mahkeme vastasınen taqip etile;
– Ukraina Ortodoks Kilisesi taqip etile, tınç diniy aqımlarnıñ müritleri aşırıcılıqta qabaatlana;
– Qırımtatar Milliy Meclisiniñ faaliyeti yasaq altında bulunmağa devam ete, Meclis reisi Refat Çubarov qanunsız şekilde maküm etildi;
– kütleviy matbuat vastaları taqip etile ve atta Rusiye işğali şaraitlerinde yarımadadaki insan aqları saasında vaziyet aqqında BM Baş kâtibiniñ maruzasını derc etkenleri içün cezalavğa oğratıla.

BM Baş kâtibi Rusiye Federatsiyasını insan aqlarınıñ qaba şekilde bozulmasını toqtatmağa ve halqara gumanitar uquq ve insan aqlarına binaen, bütün mecburiyetlerine riayet etmege çağıra.

Ukrainanıñ topraq bütünligini ve egemenligini ğayrıdan tiklemek, Ukraina vatandaşlarınıñ bozulğan aqlarını ğayrıdan tiklemek maqsadınen halqara cemiyetni işğalci devletke basqısını arttırmağa çağıramız.