Ukraina Prezidentiniñ Qırım Muhtar Cumhuriyetindeki Temsilciligi vaqtınca işğal etilgen Qırımda berim ayınıñ 17-19 künlerinde Rusiye Federatsiyası tarafından vaqtınca işğal etilgen Qırım Muhtar Cumhuriyeti ve Aqyar şeeri topraqlarında Rusiye Federatsiyası Federal Toplaşuvlar Devlet Dumasına ”saylavlarnıñ” ve vaqtınca işğal etilgen Aqyar şeerinde sözde ”yerli saylavlarnıñ” keçirilmesini takbih ete

Vaqtınca işğal etilgen Ukraina topraqlarında Rusiye Federatsiyası tarafından öz qanuniy organlarına ”saylavlarnıñ” keçirilmesi qanunsız olıp, halqara uquqnıñ şartlarını ve ümdelerini bozmaqtadır.

Temsilcilik Ukraina uquq qorçalav organlarınen beraber vaqtınca işğal etilgen Qırım Muhtar Cumhuriyeti ve Aqyar şeeri topraqlarında Rusiye Devlet Dumasına qanunsız ”saylavlarnıñ” teşkil etilmesinde ve keçirilmesinde iştirak etken şahıslarnıñ cemisini, şu cümleden sözde ”halqara közeticilerni” ve ”saylav komissiyalarınıñ” azalarını nezaret etip, cedvelge ala. Mütenasip areketlerge vekâletli organlar tarafından uquqiy ceetten qıymet kesilecek, ayrı allarda ise Temsilcilik tarafından mahsus şahsiy iqtisadiy ve diger sıñırlayıcı tedbirlerniñ (sanktsiyalarnıñ) işletilmesi teklif etilecek, şu cümleden mütenasip mesele Qırım platformasınıñ vastaları çerçivesinde köterilecektir.

Ukraina ve çetel devletlerniñ vatandaşlarını işğalci devlet tarafından teşkil etilgen bu kibi tedbirlerde ve olarnı azırlav ceryanlarında iştirak etmemege, Ukrainanıñ topraq bütünligine ve egemenligine qast etken areketlerde iştirak etmemege çağıramız.

Halqara cemiyetni vaqtınca işğal etilgen Ukraina topraqlarında qanunsız ”saylavlarnıñ” teşkil etilmesine qattı sürette qıymet kesmege ve Rusiye Federatsıyasına qarşı siyasiy-diplomatik basqı vastalarını quvetleştirmege, bundan ğayrı, vaqtınca işğal etilgen Qırımda ”saylanğan” şahıslarnıñ Rusiye Federatsiyası Devlet Dumasınıñ deputatları olaraq tanılmasına yol bermemege ve böyle şahıslarnıñ halqara meydançıqlarda Qırımnı temsil etip iştirak etmelerine imkâniyet bermemege çağıramız.

Rusiye Federatsiyasından defalarca vaqtınca işğal etilgen Qırım Muhtar Cumhuriyeti ve Aqyar şeeri topraqlarınen bağlı bütün qanunsız areketlerini toqtatmağa ve yarımadada Ukraina vatandaşlarınıñ aq-uquqlarını ve serbestliklerini bozmamağa çağıramız.

Rusiye Federatsiyası tarafından Ukraina vatandaşlarını vaqtınca işğal etilgen Qırım Muhtar Cumhuriyeti ve Aqyar şeeri topraqlarında qanunsız ”saylavlarnıñ” teşkil etilmesinde ve keçirilmesinde zorbalıqnen iştirak ettirüvnen bağlı bütün adiseleri aqqında Temsilcilikke ya da Qırım Muhtar Cumhuriyeti ve Aqyar şeeri Prokuraturasına haber etmege rica etemiz.