Ukraina Prezidentiniñ Qırım Muhtar Cumhuriyetindeki Temsilciligi vaqtınca işğal etilgen Qırım Muhtar Cumhuriyeti ve Aqyar şeeri topraqlarında Qırımtatar Milliy Meclisiniñ temsilcilerini taqip etken Rusiye Federatsiyası işğalci memuriyetiniñ nevbetteki cinaiy adımlarını taqbih ete

Bugün qanunsız şekilde keçirilgen tintüv ve Qırımtatar Milliy Meclis reisiniñ muavini Nariman Celâlnıñ yaqalanması tamır qırımtatar halqını ve onı temsil etken organlarnı Qırımdan quvuvdan, aqlarını qorçalavda er türlü birdemlik ve faallik izarlarını boğuvdan başqa bir şey degildir. 

Eminmiz ki, Rusiye Federatsiyası işğalci akimiyetiniñ vaqtınca işğal etilgen Qırım Muhtar Cumhuriyeti ve Aqyar şeeri topraqlarında mütenasip adımları Nariman Celâlnıñ cemaat ve siyasiy faaliyetinen ve şu cümleden Qırım platforması Sammitiniñ çeşit türlü meydançıqlarında çıqışta bulunğanınen bağlıdır.

Rusiye Federatsiyasını cezalavlarını toqtatmağa ve vaqtınca işğal etilgen Qırımda Ukraina vatandaşlarınıñ siyasiy baqışları, mevamları ve inançları içün muntazam sürette taqip etilüvini toqtatmağa bir kere daa çağıramız. Rusiye Federatsiyası 2017 senesi ”Ukraina RF-ke qarşı” dava boyunca vaqtınca tedbirlerni amelge keçirgen, şu cümleden qırımtatarlarnıñ öz menfaatlarını temsil etüv aqlarınıñ sıñırlanmasını yasaqlağan ve Meclis faaliyetiniñ ğayrından tiklenmesini qarar etken BM Halqara mahkemesiniñ qararını yerine ketirmelidir. 

Nariman Celâlovğa qol tutuvımıznı bildiremiz. Ukraina vaqtınca işğal etilgen Qırımnıñ işğalden azat etilmesi ve bu ve başqa cinayetlerde qabaatlı olğanlarnıñ mesüliyetke çekilmesi içün qolundan kelgenini yapacaqtır.