Ukraina Prezidentiniñ Qırım MC Temsilciligi, Strategik araştıruvlar Milliy institutı ile işbirlik aqqında añlaştı

Daimiy Temsilciniñ Birinci muavini İzet Gdanov Kıyiv şeerinde Strategik araştıruvlar Milliy institutınıñ (SAMİ) müdiri Rostıslav Pavlenko ile körüşti, körüşüvniñ neticesi olaraq vaqtınca işğal etilgen Qırım MC işğalden azat etilüvi ve ğayrıdan integratsiyası boyunca strategik programmalarnı bütün hususiyetlerni ve vaqialarnıñ ketişatını köz ögüne alıp azırlav saasında ğayretleriniñ birleştirilmesi aqqında qarar alındı.

Kiçik ay (fevral) 25 künü SAMİ Qırım ve Tavriya regionını araştıruv bölüginiñ vekili ile muşavere esnasında vaqtınca işğal etilgen yarımadada işğalci akimiyetniñ qanunsız faaliyeti neticesinde vaziyetniñ menfiy ketişatı, bu cümleden Qırımda Ukraina vatandaşlarınıñ aq-uquqlarını bozuv muzakere etildi ve em milliy, em de halqara seviyede semereli sanktsion siyaseti vastasınen işğalci memleketke basqı yapmaq kerekligi qayd etildi.

İzet Gdanov, Qırımnıñ işğalden azat etilüvi ve ğayrıdan integratsiyası boyunca strategiyanı ve milliy seviyede tasdıqlanğan mütenasip areket planını azırlamaq maqsadınen devlet müessiseleriniñ, halqara ve cemaat teşkilâtlarınıñ ğayretlerini birleştirmek kerek olğanını qayd etti.