Ukraina Prezidentiniñ Qırım MC-deki Temsilciligi bügün, 2021 senesi qara qış ayınıñ 12-de, Rusiyeniñ Rostov-na-Donu şeerindeki Cenübiy bölük arbiy mahkemesinde siyasiy sebeplerden taqip etilgen Ukraina vatandaşları, qırımtatar faalleri Enver Ömerov, Riza Ömerov ve Ayder Cepparovğa ükümler çıqarılğanı aqqında haber ete.

Esassız qabaatlavlar neticesinde çıqarılğan ükümler uzun müddetli apis cezasını belgilep, yalıñız siyasiy mabuslarnen olarnıñ aqrabalarını degil de, bütün qırımtatar halqını qorqutmağa maqsat etip qoyğandır.

59 yaşlı Enver Ömerov içün mahkeme sert rejimli koloniyada qalmasınen 18 yıllıq apis cezasını tayin etti. Onıñ oğlu Riza Ömerov içün – sert rejimli koloniyada qalmasınen 19 yıllıq apis cezası. Ayder Capparov içün sert rejimli koloniyada qalmasınen 17 yıllıq apis cezası belgilendi.

”Bugün cümlemiz Rusiye Federatsiyasınıñ yerli qırımtatar halqına qarşı nevbetteki cinayetiniñ şaatları oldıq. Vaqtınca işğal etilgen Qırım yarımadası topraqlarında yaşağan, qarşılıq kösterüv üçün taqatı ve cesareti olğan qırımtatar halqı. Siyasiy mabuslar baba-oğul Enver ve Riza Ömerovlar ile 8 balanıñ babası Ayder Capparovğa çıqarılğan ükümlerniñ asıl maqsadı, birdemlik köstermek, öz-özüni idare etmek, öz dinini kütmek ve ana topraqlarında yaşamaq aqqı içün küreşe bilgen er bir cemiyetniñ yoq etilüvidir. İşğalci akimiyetniñ qolunda bir sıra aletler bar: tsenzura, qanunsız yaqalavlar ve tintüvler, siyasiy sebeplerden taqip etüv, zorbalıqnen qaçıruv, öldürüv ve soy-soplarını ve şu cümleden balalarnı qorqutuv.  Terorizm ile küreşni manaçıq etip, bütün milletni qorqutıp, yoq etmege tırışalar. Mahkeme oturışuvınıñ arfesinde işğalci akimiyet vaqtınca işğal etilgen Qırımdan Rusiyeniñ Rostov-na-Donu şeerine kete yatqan 120 yaqın qırımtatar faalni, siyasiy mabuslarnıñ aqrabalarını yaqaladı. Olar aşsız-suvsız, suvuqta qanunsız şekilde 9 saatten ziyade tutuldı, olarnıñ mahkeme oturışuvına qoşulmaları içün Qırımnı terk etmege ruhset berilmedi”, – dep izaatlay vaziyetni Ukraina Prezidentiniñ Qırım MC-deki Temsilcisiniñ muavini Tamila Taşeva. 

Ukraina Prezidentiniñ Qırım MC-deki Temsilciligi vaqtınca işğal etilgen Qırımda ve Aqyar şeerinde yüz bergen insan aqlarını bozuv saasında er türlü adiselerni qayd ete, faaliyetini uquq qorçalav organlarınen uyğunlaştıra, ukrain cemiyetini ve Ukrainanıñ halqara ortaqlarını Rusiye Federatsiyasınıñ cinayetleri aqqında haberdar ete. Bügün Ukraina Prezidentiniñ Qırım MC-deki Temsilciligi siyasiy mabuslar Enver ve Riza Ömerovlar, Ayder Capparovnıñ soy-soplarına ve bütün cesür qırımtatar halqına qol tutuv sözlerini bildire ve Ukraina vatandaşlarınıñ azat etilmesi oğrunda qolundan kelgenini yapacaqtır.

 

Hatırlatamız ki, 2020 senesi ilk qış ayınıñ 23-de, ”devlet qabaatlavı” Qarasasuvbazardaki «Hizb ut-Tahrir davasınıñ» iştirakçileri Enver Ömerov, Riza Ömerov ve Ayder Capparov içün büyük ükümler talap etti:

(1961 senesi doğma) Viktor oğlu Enver Ömerov 2019 senesi ilk yaz ayınıñ 10-da Rostov-na-Donu şeerindeki mahkeme oturışuvına ketken arada yaqalanğan edi. Evli, eki balası bar. Faal ve cemaat erbabı olaraq Qarasuvbazar şeerinde balalar içün kütleviy bayramlar teşkil ete edi. Bundan evel quvetçiler ve akimiyet organları tarafından cezalavlarğa oğrağan vatandaşlarına destek bere edi, çu cümleden, göñülli faaliyetlernen oğraşa, siyasiy mabuslarnıñ qorantalarına qol tuta, siyasiy mabuslarnıñ özlerine erzaq yollamağa yadım ete edi.

(1988 senesi doğma) Riza Ömerov – Enver Ömerovnıñ oğlu. Evinde tintüv keçirilgen soñ babasınen bir künde, yani 2019 senesi ilk yaz ayınıñ 10-da yaqalanğan edi. Riza Ömerovnıñ yüklü ömür arqadaşı tintüv esnasında müddetten evel bala tapmağa başlağanı içün hastahanege alıp ketildi. Riza Ömerov evli, onıñ dört balası bar

(1980 senesi doğma) Enver oğlu Ayder Capparov – Qarasuvbazar rayonındaki Zuya qasabasınıñ sakini. 2019 senesi ilk yaz ayınıñ 10-da evinde keçirilgen tintüvden soñ yaqalanğan edi. Evli, onıñ 8 balası bar. Lübnandaki Al-Cinan Universiteti Arap tili ve edebiyatı fakultetinde oqudı. Yerli caminiñ müezzini edi. Yaqalanmaqtan evel kiçik ve büyük şahsiy şirketlerde energetika saasında tesisatçı olaraq çalıştı.