İşğal etilgen Qırım ile memuriy sıñırdaki KÇNN-larnı abadanlaştıruv işlerini ilk qıs (dekabr) ayı 20 kününe qadar bitirmek kerek”, – Volodımır Zelenskiy

Herson vilâyetine iş ziyareti esnasında Prezident Volodımır Zelenskiy Qırım Muhtar Cumhuriyeti ile memuriy sıñırdaki ”Çoğar” kiriş-çıqış nezaret noqtasında bulundı. 2014 senesinden başlap, devet başlığı ilk kere işğal etilgen Qırım ile memuriy sıñırnı ziyaret etti.

Prezident KÇNN infraterkibini ve insanlar nasıl şaraitlerde memuriy sıñırda nezaretten keçkenini teşkerdi. Prezident işğal etilgen Qırımğa yol tutqan vatandaşlarnen ve ”Çonğar” KÇNN yanında yaşağan insanlarnen subetleşti.

”Çonğar” ve ”Qalançaq” KÇNN-lerni abadanlaştıruv leyhalarını yerine ketirüv boyunca muşavere esnasında Herson vilâyeti devlet memuriyetiniñ yañı tayin etilgen reisi Yuriy Gusev qayd etti ki, vaqtınca işğal etilgen topraqlardan kelgen insanlar Avropa Herson vilâyetinden başlanğanını is etmeliler. Ve bunı hızmetleriniñ yüksek keyfiyetinen ve diqqatlarınen er seviyedeki memurlar ile devlet hızmetçileri numayış etmeli.

”İşğal başlanğandan berli, Qırım MC ile memuriy sıñırdan keçken insanlar kerekli infraterkip olmağanından sebep qıynalalar: yazıqlar olsun ki, keyfiyetli infraterkip 2014 senesinden berli qurulmadı. KÇNN-daki problemalar kompleks şekilde çeşit türlü icra akimiyet organlarınıñ uyğunlaştırılğan areketlerini talap etmekte”, – dep ayttı o.

Yuriy Gusev aytqanına köre, KÇNN abadanlaştıruv leyhalarını yerine ketirüvde böyle telükeler rast kelmekte: qaparcılıq, maliye qıtlığı ve icracılar tarafından leyha cızuv ve qurucılıq işleriniñ vaqıtında yerine ketirilmemesidir.

Vilâyetniñ yañı yolbaşçısı KÇNN abadanlaştıruvnıñ birinci basamağı, yani rejim zonalarınıñ teşkil etilüvi boş ay (noyabr) 15 kününe qadar yekünlenecegini qayd etti.

Ukraina Prezidenti öz nevbette leyhanıñ ekinci qısımını, yani hızmet merkezleriniñ, avtobus stantsiyalarınıñ ve memuriy hızmet merkezleriniñ teşkil etilüvini ilk qış ayı 20 kününe qadar bitirmege avale etti.

”İlk qış ayı 20 kününe qadar bitsin, vaqıt yeterlidir. Olmasa, vilâyet devlet memuriyetiniñ yañı reisi keçmişte qalacaq. Bu – kerçektir”, – dep beyan etti Volodımır Zelenskiy.

Aynı vaqıtta muşavere iştirakçileri Prezidentke birinci nevbetniñ bitirilmesi içün al-azırda ayırılğan 100 million grıvnâ yeterli olacağını bildirdiler. Aynı vaqıtta ekinci nevbet içün 70 million grıvnâ devlet bücetinden ale daa ayırılmadı.

Devlet başlığı KÇNN abadanlaştıruv leyhasına bütün kerekli maliye berilmesinde yardım etmege vade etti.

Menba: https://www.president.gov.ua/news/povne-oblashtuvannya-kpvv-na-adminmezhi-z-okupovanim-krimom-56421