Ukraina Prezidentiniñ Qırım MC-deki Daimiy Temsilcisi Anton Korınevıç ”Kreml mabusları” serlevalı bir künlük tedbirde iştirak etti

”Bügünki vaqtınca işğal etilgen Qırım renksiz, adaletsiz topraq parçasıdır. Bir de bir Ukraina vatandaşı özüni Qırımda havfsızlıqta is etemey, onı er türlü cinayette qabaatlap, bu sebepten qanunsız şekilde azatlıqtan marum ete bileler. Belli bir siyasiy, diniy baqışlar, etnik ya da milliy mensübiyet boyunca azatlıqtan marum etüv, yazıqlar olsun ki, işğal etilgen Qırımda adetiy adiselerdir”, – tedbirniñ açıluvı munasebetinen keçirilgen matbuat konferentsiyasında dep qayd etti Ukraina Prezidentiniñ Qırım MC-deki Daimiy Temsilcisi Anton Korınevıç.

Vaqtınca işğal etilgen Qırımda muntazam şekilde cezalavlar yüz bermekte, işğalci akimiyet yarımadada yaşamağa devam etken ukrainlerni ve qırımtatarlarnı taqip etmektedir. Al-azırda Rusiye Federatsiyasınıñ ve vaqtınca işğal etilgen Qırımnıñ apishanelerinde 97 siyasiy mabus ve 24 cenk esir deñizci bulunmaqta. Olarnıñ episi siyasiy, diniy, ya da başqa sebepten taqip etüv neticesinde Rusiye apishanelerine tüşti.

2019 senesi arman (avgust) ayı 15 künü sabahtan Herson şeerindeki Suvorov soqağında 121 qapqandan ibaret olğan bünye yapıldı, qapqanlarnıñ miqdarı siyasiy mabuslarnıñ sayısını temsil ete, qapatılğan çeneleri ise ”avnıñ” tutulğanını köstere.

Aynı şu künü aqşam ”Qaytuv içün yaşamaq” serlevalı film numayış etildi, işbu film 1944 senesi yüz bergen sürgünlikten soñ Qırımğa qaytuv içün küreşken qırımtatarlarnıñ milliy ruhınen tanıştıra.

Film bitken soñ seyirciler milliy ruhunıñ tarihini Qırımni ilhaq etüv teşebbüsinden soñ qırımtatarlarnıñ başına kelgen zemaneviy adiseler ile teñeştirdiler, Qırımdaki şimdiki vaziyetni ve siyasiy sebepten taqip etüvlerni muzakere ettiler, bundan ğayrı, qol tutuvğa ve birdemlikke muhtac olğan ”Kreml mabuslarını” añdılar.

Muzakere etüv esnasında Anton Korınevıç Qırım meselesini em halqara siyasetniñ, em de evimizde, yani Ukrainanıñ kün tertibinden coyulmaması içün qolumuzdan kelgenini yapmaq kerek olğanını qayd etti. Qırım meselesi em Kıyivde, em Hersonda, em KÇNN-da, yani er yerde eşitilmeli.

Uquqiy islâat meseleleri boyunca Komissiyası yanında vaqtınca işğal etilgen topraqlarnı ğayrudan integratsiya etüv iş gruppasınıñ reberi olaraq, ”Bir çoq cemaat teşkilâtlarınıñ vekillerinden ibaret olğan iş gruppası asılında işğalden azat etüv ve ğayrıdan integratsiya boyunca strategiya üzerinde çalışacaq. Ümüt etem ki, olar insanlarnıñ, cemiyetniñ fikirlerini aks etecek, biz mıtlaqa olarnen çalışırmız”, – dep qayd etti Daimiy Temsilci.

”Qırım meselesinde devlet memur, siyasiy şahıs, cemaat faali olsa olsun, er birimizniñ maqsadı bir, bunıñ içün epimiz beraberlikte çalışmalımız”, – dep yekünledi Anton Korınevıç.

Tedbirniñ teşkilâtçıları ile ortaqları: ”ZMİNA” İnsan aqları merkezi, Qırım aq-uquq qorçalav gruppası, insan aqları boyunca Ukraina Helsinki birligi, Grajdanlıq serbestlikleri merkezi, ”Qırım-SOS”, #SaveOlegSentsov, Kreml siyasiy mabuslar soy-aqrabalarınıñ birligi.

Böyle tedbirler Odesa şeerinden başlanıp, Ukrainanıñ 10 şeerinde keçirilecek. Herson ise regional seferindeki ekinci şeerdir.